SSRİ-nin və Rusiya Federasiyasının məşhur rejissoru Eldar Ryazanov bu gün dəfn olundu.

ANS PRESS-in məlumatına görə, rejissor Moskvanın Novodeviçye qəbrstanlığında dəfn edilib. Onun məzarı SSRİ-nin məşhur diktoru Yuri Levitanın yaxınlığındadır.

Dəfn mərasimində yüzlərlə insan iştirak edib. O cümlədən aktyorlar, rejissorlar və digər mədəniyyət xadimləri əfsanəvi rejissorla mərkəzi ədəbiyyat evinə gələrək vidalaşıblar.

30 noyabrda Eldar Ryazanov 88 yaşında Moskvada dünyasını dəyişib. Noyabrın 21-də xəstəxanaya yerləşdirilən rejissorun səhhəti sonradan kəskin pisləşib. Ryazanovun qohumları məşhur rejissorun ürək çatışmazlığından öldüyünü bildiriblər.

SSRİ xalq artisti Eldar Ryazanov 1927-ci ildə Rusiyanın Samara şəhərində dünyaya gəlib. Rejissorluqla yanaşı ssenarist də olan Eldar Ryazanov əsasən; “İtalyanların Rusiyada qeyri-adi sərgüzəştləri”, “İşdə məhəbbət macərası”, “Karnaval gecəsi”, “Qoca quldurlar” və s. filmlərlə şöhrət qazanıb.