Mədəniyyət və Turizm Nazirliyinin Mədəniyyətşünaslıq üzrə Elmi-Metodiki Mərkəzi ilə “Uşaq və Yeniyetmələrə Dəstək” İctimai Birliyi sosial şəbəkələrdə “Kəlağayı günü” adlı internet-aksiya həyata keçirib. Bütün sosial şəbəkə istifadəçilərinə, gənclərə, QHT-larə və digər qurumlara çağırış elan edilib.

Mərkəzdən AZƏRTAC-a bildirilib ki, bu internet-aksiya, Azərbaycanın milli mədəni irsinin qorunmasına, tanıdılmasına və təbliğinə xidmət edir. Sosial şəbəkə istifadəçiləri Mədəniyyətşünaslıq üzrə Elmi-Metodiki Mərkəzinin “memm.az” rəsmi saytında “Kəlağayı günü internet-askiya”sı adı altında yerləşdirilmiş xəbərə aid xüsusi şəkili ilə bir gün müddətində şəxsi profil şəklini əvəz etməklə internet-aksiyaya dəstək ola bilərlər. Aksiyaya dəstək olan qurumların adları və loqoları həmin şəkildə öz əksini tapacaq.

Bildirilib ki, “Kəlağayı” faylı 26.11.2014-cü ildə Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın dəstəyi ilə Mədəniyyət və Turizm Nazirliyi tərəfindən hazırlanaraq “Kəlağayı simvolizmi və ənənəvi sənəti” adı ilə UNESCO-nun Qeyri-maddi mədəni irs üzrə Reprezentativ siyahısına daxil edilib. Bu hadisə xalqımıza məxsus mədəni irs nümunələrinin Ermənistan tərəfindən mənimsənilməsi hallarının qarşısının alınması ilə bağlı mübarizəsində böyük bir qələbədir. Bu qələbə sevincini birgə yaşamaq niyyəti ilə hər bir kəs bu aksiyada iştirak etməyə dəvət edilir.