Səfərbərlik və Hərbi Xidmətə Çağırış üzrə Dövlət Xidməti tərəfindən ötən ildən başlayaraq regionlarda “Vətənin müdafiəsinə hazıram!” adlı hərbi-vətənpərvərlik mövzusunda silsilə tədbirlər həyata keçirilir. Bu tədbirlər gənclərin hərbi-vətənpərvərlik tərbiyəsi işini daha da gücləndirmək, çağırışaqədərki hazırlığın keyfiyyətini daha da yaxşılaşdırmaq, gənc nəsli milli dövlətçilik ruhunda tərbiyə etmək, onlarda müstəqil dövlətimizə sədaqət hissini möhkəmləndirmək məqsədi daşıyır.

AZƏRTAC xəbər verir ki, növbəti belə tədbir Bərdə rayon mədəniyyət evində təşkil olunub. Bərdə, Ağdam, Tərtər və Yevlax rayon icra hakimiyyətlərinin nümayəndələrinin, Dövlət Xidmətinin rayon şöbələrinin, bu rayonlarda yerləşən hərbi hissələrin şəxsi heyətinin, orta məktəblərin yuxarı sinif şagirdlərinin, şəhid ailələri üzvlərinin, Qarabağ müharibəsi veteranlarının iştirak etdikləri tədbirdə dövlət himni səsləndirilib, şəhidlərimizin xatirəsi birdəqiqəlik sükutla yad edilib.

Bərdə Rayon İcra Hakimiyyəti başçısının müavini, Yeni Azərbaycan Partiyası Bərdə rayon təşkilatının sədri Fəqət Şadlinskaya və Səfərbərlik və Hərbi Xidmətə Çağırış üzrə Dövlət Xidmətinin rəis müavini, general mayor Novruzəli Orucov çıxış edərək, müstəqil Azərbaycanda milli ordu quruculuğu prosesindən, gənclərdə hərbi vətənpərvərlik hissinin artırılması sahəsində görülən işlərdən, ordu ilə xalqın birliyindən bəhs edib, gənclərin hərbi-vətənpərvərlik tərbiyəsində belə tədbirlərin əhəmiyyətini yüksək qiymətləndiriblər.

Şəhid anası Nazənin Səfərova, çağırışaqədərki hərbi hazırlıq fənni üzrə metodist İsa Abbasov və digər çıxışçılar gənclərə Vətənimizin sərhədləri keşiyində ayıq-sayıq dayanmağı, işğal altındakı torpaqlarımızın düşməndən azad edilməsi üçün hər an hazır olmağı tövsiyə ediblər.

Maraqla qarşılanan tədbirin bədii hissəsində Bərdə rayon məktəblilərinin ifasında vətənpərvərlik mövzusunda kompozisiya, şeir və rəqs nümunələri nümayiş olunub.

Sonda “Ya Qarabağ, ya ölüm” filmindən fraqment göstərilib, hərbi vətənpərvərlik mahnılarının mahir ifaçısı Şəmistan Əlizamanlı öz repertuarından sevilən musiqiləri ifa edib.