Tanınmış rusiyalı kulinar Qarabağdakı erməni vandalizmindən dəhşətə gəlib

Tanınmış rusiyalı kulinar Qarabağdakı erməni vandalizmindən dəhşətə gəlib backend

"İndi mənim üçün "mən azərbaycanlıyam" kəlməsi tamamilə başqa məna daşıyır. Çünki bu səfər məni 100% azərbaycanlı etdi! Mən tamamilə azərbaycanlıyam - təpədən-dırnağa qədər. Harada yaşamağımdan, hansı dildə düşünməyimdən, danışmağımdan asılı olmayaraq, ürəyim və ruhumla azərbaycanlıyam! Qeyri-insani törəmələr evlərdən şifer və daş oğurlaya, daş divarları dağıda bilər, amma sevgimi oğurlaya, doğma mətbəximi tərənnüm etməyə, sözləri kitablara, notları melodiyalara çevirməyə davam etmək əzmimi məhv edə bilməzlər. Çünki mən azərbaycanlıyam!"

Qaziler.az xəbər verir ki, bu fikri Diasporla İş üzrə Dövlət Komitəsinin dəvəti ilə Şuşada keçirilmiş Dünya Azərbaycanlılarının V Qurultayında iştirak etmiş tanınmış rusiyalı kulinar, teleaparıcı, videobloger, özbək və Azərbaycan mətbəxlərinə həsr olunmuş kitabların müəllifi Stalik Xankişiyev söyləyib.

Şuşaya səfəri zamanı erməni vandallarının Azərbaycanın dilbər guşəsi Qarabağda törətdikləri vandalizm aktlarını görəndə ruhunun təməllərinin sarsıldığını vurğulayan S.Xankişiyev soydaşlarımızı tarixi vətənlərini dəstəkləməyə çağırıb: "Şuşada olduğum ilk gün məni qəzəb, ağrı, kin və sakit ümid bürüdü. İkinci gün qurultay başladı, Azərbaycan Prezidenti İlham Əliyev gəldi və nitqlə çıxış etdi. Azərbaycanlısan? Yaşadığınız yerlərdə qollarınızı çırmalayın! Tarixi vətənimiz işimizi gözləyir, onun dəstəyə, köməyə ehtiyacı var".

Stalik Xankişiyev Zəfər yolu boyu işqaldan azad edilmiş Qarabağ torpaqlarında və Şuşada gördükləri barədə ağır təəssüratlarını belə bölüşüb: "...Birdən yoldaşlarım susdu və avtobusların pəncərələrinə yapışdılar. Qəbiristanlığa oxşadığı üçün qorxulu idi. Sən demə, əyilmiş sütunlar bir vaxtlar üzüm bağı olub, indi üzümlük qəbiristanlığına çevrilib. Otuz il ərzində qarət edilən, zorlanan, dağıdılan ərazinin başlandığı yeri göstərirdi və bunlar şər fanatlarının "əməyi"nin nəticəsidir. Hətta heyvan sürüləri də orada otlamır, çünki qeyri-insani törəmələrin bu diyarda yerləşdirdiyi minlərlə mina var. Qara ruhlarını bürüyən ağılsız nifrətin abidəsi kimi bu tarlalara ölüm səpmək üçün vaxt itirməyə heyifləri gəlməyib".

O, nəzərə çatdırıb ki, üzüm qəbiristanlıqlarının arxasınca bütöv şəhərlərin, kəndlərin qəbiristanlıqlarını görüblər: "Biz işğaldan azad edilmiş Qarabağ torpaqlarına daxil olduq. Başa düşürsünüzmü, hər bir normal insanın arzusu bir az torpaq sahibi  olmaq, üzərində ev tikmək, toya qonaq çağırmaq, xanımını evinə gətirmək və uşaq dünyaya gətirməkdir. Amma kimsə bir neçə onillikləri öz evini tikməyə deyil, başqalarının evlərini dağıtmağa sərf etdi!"

Soydaşımız xüsusilə qeyd edib ki, bu evlər, bütöv kəndlər, şəhərlər son döyüşlərdən, bombalardan, toplardan dağıdılmayıb və Qarabağın "Xirosima"ya çevrilməsi atom bombasının köməyi olmadan xalq adlandırılması qeyri-mümkün olan erməni vandalları tərəfindən törədilib: "Xalq?! Sırf mənim kimi azərbaycanlı olduqlarına görə başqalarının tikdiklərini ev-ev dağıdan, həyatının mənasını, tarixi ələ salan adamları doğrudanmı belə adlandırmaq olar? Təsəvvür edirsinizmi, ən azı bir kiçik evin dağıdılması üçün nə qədər əmək sərf edilməlidir? Qurmaq yox, yaratmaq yox, dağıtmaq kimə lazım idi? Kimin qara ürəyi bu qədər qəzəb və nifrətlə qaynayır?"

Kulinar gördükləri vəhşətlər qarşısında ağladığını etiraf edib: "Nə özümü, nə də göz yaşlarımı saxlaya bildim. Təsəvvür edirdim ki, bu yer üzündə nə qədər uşaq doğulmayıb, nə qədər toylar çalınmayıb, nə qədər qocalar ata-babalarının çoxdan uyuduğu yerdə dəfn edilməyib. Ağladım, çünki bundan əvvəl faciəni başqa insanların hekayələrindən və reportajlarından bilirdim. Amma indi bütün mənzərəni öz gözlərimlə gördüm və bu, daha da dəhşətli oldu. Yəqin ki, mən onun miqyasını yanlış təsəvvür edirdim. Gözəl, günəşli bir yaz günündə gördüklərim dəhşətin təcəssümü, həyatımda baş verən ən dəhşətli mənzərəydi".

 

Stalik Xankişiyev bildirib ki, Qarabağda aparılan yenidənqurma və tikinti-abadlıq işləri barbarların törətdikləri ilə qeyri-adi təzad təşkil edir: "Əslində mən niyə artıq yer üzündən yox olmuş bu iki xalqı - barbarları və vandalları təhqir edirəm? Sonra gördüklərimi hətta onlar da törətməyiblər. Bir vaxtlar çox gözəl olmuş evlərin damları yox idi, onlardan yalnız sökük divarlar və oyulmuş gözlər kimi boş pəncərə açılışları qalmışdı. Evlər sanki soruşurdular: "Niyə?! Damı, qapıları, pəncərələri bizə qaytarın, şüşə salın - pis havadan, soyuqdan və istidən sığınmaq, isti və sərinlik vermək istəyirik! Otaqlarımızda gülən uşaqlar haradadır? Onlar böyüdülər? Onların uşaqları harada böyüyür, harada oxuyur? Onları yanımıza gətirin, yetim qalmaq bizim üçün dözülməz ağrıdır!"

Videobloger qeyd edib ki, Şuşanın mərkəzi meydanında dahi bəstəkar Üzeyir Hacıbəylinin, Qarabağ xanının qızı, şairə Natəvanın, məşhur xanəndə Bülbülün büstləri üzərində erməni vandallarının güllələrinin izləri qalıb: "Doğrudanmı qadın simasına da güllə ata bilərdilər? Bəli, bacarıblar! Nifrətdən və cəzasızlıqdan sərxoş olmuş rəzil törəmələrin əli buna qalxıb. İndi onlar nasizmin, hətta faşizmin izlərini nümayiş etdirən abidələrdir. Qonşu respublikanın çirkin siyasətçilərinin mənim xalqıma olan sərsəm nifrətini xatırladır. Uzun illər yanaşı yaşadıq, səmimi dost olduq, dil, mənşə və din fərqliliyinə baxmayaraq, hər şeyin ən yaxşısını paylaşdıq, torpağın, meyvəsinin hamıya yetəcəyinə inandıq! Hamı üçün kifayət qədər musiqi, ləzzətli yeməklər, rəqslər olacaq, günəşin altında hər kəsin işləməsi və həyatdan həzz alması üçün kifayət qədər yer olacaq! Bir insana çox şeymi lazımdır? Dünyəvi yolun sonunda iki metrlik yer lazım olur, o vaxta qədər olan müddət ərzində ev tikmək, bağçılıq etmək, uşaq dünyaya gətirmək və böyütmək lazımdır. Nəyə görə bizim abidələrə, cansız büstlərə "Kalaşnikov"dan atəş açılıb? Siz hətta bizim qəbirlərimizi qazıb, ölülərimizi də atəş açmısınız!"

Kulinar xatırladıb ki, erməni vandalları bu mənəviyyatsızlığa da əl atıblar: "Onlar daha zəngin qəbirləri seçirdilər. Əvvəlcə məzar daşını sökür, mərmərdən və ya qranitdən yazıları və portretləri silir, təlaşla satışa aparırdılar. Sonra... qəbirləri qazdılar. Bilirsiniz niyə? Yadınızdadırmı, 50 il əvvəl qızıl dişlər dəbdəydi?"

Stalik Xankişiyev Şuşadakı evlərdə bərpa işlərinin aparıldığına şahid olub: "Deyirlər ki, sovet vaxtından qalan beşmərtəbəli binalar söküləcək - biz daha yaxşı, daha rahat, gözəl binalar tikəcəyik ki, bu qədim şəhərə, onu əhatə edən təbiət gözəlliyinə layiq olsun. Biz küçələri, yolları təmizləyəcəyik və bərpa edəcəyik - qoy onlar yenidən məktəblərə, işə, məscidə və xristian kilsəsinə istiqamətlənsin. Xristian məbədləri qalmalıdır, məscidlərimizi donuzxanaya çevirənlərdən fərqli olaraq, onlar humanizm abidəsi kimi bərpa olunmalıdır. Bütün zibilləri təmizləyəcəyik - istər dördayaqlı, istərsə də ikiayaqlı mal-qaranın arxasınca təmizləməkdən adam utanmamalıdır".

Tanınmış videobloger bir azərbaycanlı olaraq dünya ictimaiyyətini Azərbaycana, onun mədəniyyət paytaxtı olan Şuşaya gəlməyə dəvət edib: "Bütün dostlarıma, mənimlə eyni dəyəri - ləyaqətlə yaşamaq və yer üzündə yaxşı iz buraxmaq istəyən hər kəsə əl uzadıram. Azərbaycana gəlin, Şuşada gözəl meydan var. Biz əl-ələ verib rəqs edəcəyik, biz rəmz olaraq bütün yer kürəsini əhatə edəcəyik ki, planetimizdə bir daha millətlərarası nifrətin və şovinizmin meydan sulanmasına imkan verməyək. Dünyanı qorumağa dəyər!"

loading...
Diaspora