Londonda yerləşən Memarlar Birliyinin (Architecture Association – AA) Məktəbi YARAT Müasir İncəsənət Məkanının tərəfdaşlığı ilə Azərbaycana səfər edib burada praktiki məşğələ keçirəcək. YARAT Müasir İncəsənət Məkanı böyük məmnunluqla bildirir ki, avqustun 25-də başlayıb sentyabrın 4-də bitən müddət ərzində Azərbaycanın paytaxtı Bakıda dünyanın ən nüfuzlu memarlıq məktəblərindən biri özünün məşhur səyyar məktəbi çərçivəsində dərslər keçirəcək.
AA Baku Məktəbi istedadlı şəxslərin qarşısında açılan öyrənmək və novatorçu təşəbbüslərini nümayiş etdirmək üçün gözəl bir imkandır. Bundan əlavə, sözügedən tədbirin iştirakçıları yuxarıda göstərilən tarixlərdə təcrübəli müəllimlər və başqa ölkələrdən gəlib AA Baku Məktəbinə qatılan dinləyicilərlə bilavasitə ünsiyyətdə olacaq və bunun sayəsində dünya miqyaslı təcrübəyə yiyələnəcəklər.Londonda yerləşən nüfuzlu Memarlar Birliyinə birbaşa aidiyyəti olan AA Baku Məktəbi Qafqaz regionunda ilk səyyar məktəb olaraq, Asiya ilə Avropada fəaliyyət göstərən bu cür məktəblər şəbəkəsinə daxildir. AA Baku Məktəbinin işini AA Birliyinin müəllimləri – memarlar Omid Kamvari və Kasper Əks quracaqlar. AA Baku Məktəbi çərçivəsində onlar Bakının zəngin tarixini, yurdumuzun Qərblə Şərqi birləşdirən yollarda yerləşməsini, ölkə hüdudlarının necə sosial, mədəni və siyasi dəyişikliklərə meydan olduğunu tədqiq edəcəklər. Dinləyicilərə Azərbaycanın unikal mövqeyini və qonşuları ilə münasibətlərini nəzərə almaqla, ölkəmizin gələcəyini tədqiqat hədəfi kimi ortaya qoyan aktiv bir praktiki məşğələdə iştirak etmək təklif olunacaq.
Həm yerli, həm də qlobal baxımdan Bakının bugünkü və gələcək məkan quruculuğu ideyalarına maraq göstərən və 17 yaşı tamam olmuş şəxslər – istər formalaşan, istərsə də tam formalaşmış memar, rəssam, alim, mühəndis, kurator və yazarlar məktəbə qəbul olunur. İştirakçılar lazım olan materiallar ilə təmin olunacaq, yaşayış yeri ilə isə təmin olunmayacaqlar. Dərslər ingilis dilində keçiriləcək.
Bu praktiki məşğələ ayrıca hissələrdən təşkil olunaraq, xüsusi obyektlərə ziyarət, model üzərində çalışma, eləcə də müxtəlif material sistemləri və məkan konqlomeratları kimi mövzular ətrafında debat və müzakirələrdən ibarət olacaq. Praktiki məşğələnin sonunda isə dinləyicilər öz işlərini ictimaiyyət üçün sərgidə nümayiş etdirəcək və məkan barədə ideyaların geniş müzakirəsini keçirəcəklər.
İştirak etmək istəyən şəxslər www.yarat.az vebsaytından müvafiq müraciət blankını öz kompüterinə endirib doldurduqdan sonra, ona ayrıca qoşulan tərcümeyi-hal (CV) və iştirak etmək marağını bildirən məktub (bir səhifə həcmində) ilə birlikdə YARAT-a göndərməlidirlər. Yerlər məhduddur, odur ki, toplanan müraciətlər əsasında ən münasib namizədlərin müəyyən edilməsi mərhələsi də nəzərdə tutulmuşdur. Yalnız uğurlu namizədlərə müvafiq bildiriş göndəriləcək. Müraciət sənədlərinizi lütfən bu ünvanlara göndərin: [email protected] və ya [email protected]. Azərbaycandan müraciət edən dinləyicilərin iştirak haqqı YARAT Müasir İncəsənət Məkanı tərəfindən ödəniləcək. 15 avqust tarixindən sonra göndərilmiş müraciətlərə baxılmayacaq. Əlavə məlumat üçün +994 50 218 06 29 nömrəsinə zənq edin.
AA Baku Məktəbi haqqında:
AA Baku Məktəbinin proqramı elə bir qlobal və inkişafda olan əməkdaşlıq platformasıdır ki, onun sayəsində AA təlim-tədris yanaşması beynəlxalq pedaqoji elmin ən son nailiyyətlərinə söykənir və dünyanın hər yerinə çatdırılır. Daha ətraflı məlumat aşağıdakı internet ünvanından əldə edilə bilər: http://www.aaschool.ac.uk/STUDY/visitingProgramme.php
AA Baku Məktəbinin müəllimləri haqqında:
Omid Kamvari (BA fərqlənmə diplomu, AADipl, AAMsc, PgDip, ARB, RIBA kursunun rəhbəri) əvvəl Greenwich universitetində memarlıq üzrə təhsil alaraq sonra Memarlar Birliyinə keçib diplom işini orada bitirmişdi, magistr dərəcəsini də orada qazanmışdı. Yeni texnologiyalar və dizayn üzrə magistr dərəcəsini qazandıqdan sonra, o, Foster & Partners şirkətində çalışdı. Bu müddət ərzində o, çoxsaylı layihələr hazırlayıb həyata keçirdi, o cümlədən Bratislavada pərakəndə satış parkı, İtaliyada qarışıq istifadə obyekti, Mərakeşdə kommersiya ofisləri, İtaliyada və Liviyada hotel müəssisələri.
Kasper Əks danimarkalı memar, dizayner və tədqiqatçıdır. Londonda (İngiltərə) yaşayır. Magistr dərəcəsini Londonda yerləşən UCL universiteti nəzdində Bartlett Memarlıq Məktəbini bitirərək qazanmışdı. Ondan öncə isə Danimarkada yerləşən AAA Memarlıq Məktəbini bitirərək memarlıq dizaynı üzrə bakalavr dərəcəsini qazanmışdı. Hazırda Kasper Əks Brüsseldə və Londonda yerləşən LASSA memarlıq şirkətinin ştatdankənar memarıdır. Şirkətin fəaliyyəti mebeldən tutmuş şəhərsalma planlarına kimi müxtəlif beynəlxalq sifarişlər və müsabiqələr üzərində qurulub. LASSA-ya keçməzdən öncə Kasper Əks başqa nüfuzlu memarlıq şirkətlərində işləyib, o cümlədən: Asymptote (Nyu-York), Marcos and Marjan Ltd. (London) və MAPT (Kopenhagen).
YARAT Müasir İncəsənət Məkanı haqqında
YARAT Azərbaycanın paytaxtı Bakıda yerləşən qeyri-kommersiya təşkilatıdır, Aida Mahmudova ilə bir qrup rəssam tərəfindən 2011-ci ildə təsis edilmişdir. YARAT Azərbaycanda müasir incəsənətin dəstəklənməsi və geniş ictimaiyyətə çatdırılması məqsədi ilə fəaliyyət göstərir, Azərbaycan incəsənətinin ölkə daxilində və beynəlxalq aləmdə təmsil olunması ilə məşğuldur.
YARAT (azərbaycanca “yaratmaq” sözünün mənasında) tərəfindən indiyə qədər, əksəriyyəti Bakıda təşkil olunaraq, 145-dən artıq layihə həyata keçirilib. YARAT-ın fəaliyyətində əsas mahiyyət kəsb edən tədris-təlim işi art-rezident səfərlərindən, praktiki məşğələlərdən, mühazirələrdən və film nümayişlərindən ibarətdir. 2014-cü ildə yay məktəbi təşkil olunmuşdu, eləcə də yeni bir binası istifadəyə verilmişdi. Həmin binada rəssam emalatxanaları və “art-rezident” proqramı üçün mənzillər yerləşir. 2015-ci ilin mart ayında YARAT Müasir İncəsənət Mərkəzi də açılıb. YARAT-ın ilk daimi sərgiləmə yeri olan bu yeni mərkəz müasir incəsənətə və incəsənətin tədrisinə xidmət edən regional miqyaslı bir qovşaqdır. Təşkilatın ARTIM proqramı (azərbaycanca “artmaq” sözünün mənasında) incəsənətə meyl göstərən gəncləri dəstəkləyir, onların işlərini kuratorların diqqətinə çəkib sərgilənməsinə imkan yaradır.
