Bu gün şəhid ailələri Azərbaycanda keçirilən 1-ci Avropa oyunlarının bir qrup qalibləri və onların məşqçiləri ilə görüşüblər. QAZİLER.AZ saytının verdiyi məlumata görə, “Azərbaycanın qələbəsi hamımızın qələbəsidir” adlı tədbiri şəhid xanımı, Birliyin sədri Almaz Zeynalova açaraq ölkəmizdə keçirilən oyunların əhəmiyyətindən, idmançılarımızın qazandığı qələbədən danışıb.

O, bildirib ki, bu Azərbaycanın, o cümlədən Azərbaycan Respublikasının Prezidenti, Ali Baş Komandan İlham Əliyevin, 1-ci Avropa oyunlarının təşkilat komitəsinin rəhbəri Mehriban xanım Əliyevanın uğurdur: “Bütün xalqımız kimi, biz Şəhid ailələri də bu uğura çox sevindik, bundan böyük qürur duyduq. İnşallah, Azərbaycan Respublikasının Prezidenti, Ali Baş Komandanımız İlham Əliyevin rəhbərliyi altında işğal altındakı torpaqlarımızı da azad edəcəyimiz günü gözləyirik! Biz buna əminik! Şəhid ailələri həmişə dövlətimizin, Ali Baş Komandanımız cənab İlham Əliyevin yanında olub, bundan sonra da olacaq.”

Tədbirdə 1-ci Avropa oyunları ilə bağlı sözügedən birliyin hazırladığı video çarx da təqdim edilib.

Sonda idmançılara Şəhid Ailələrinə Sosial Dəstək İctimai Birliyinin xüsusi fəxri diplomları verilib.

Tədbirdə Şəhid ailələri, idmançılarla ilə yanaşı sənət adamları, QHT rəhbərləri, KİV və tanınmış ictimaiyyət nümayəndələri iştirak edib.