Bu gün Bakı-2015 I Avropa Oyunlarında cüdo üzrə yarışlarda daha 5 çəki dərəcəsində idmançılar mübarizə aparırlar. Apasport.az saytının məlumatına görə, bu çəkilərdən yalnız birində (qadınlar, +78 kq) çıxış etməyən Azərbaycan yığması günü erkən başa vurub. Tatamiyə çıxan 5 cüdoçumuz 1/8 final səddini belə keçə bilməyiblər.

90 kq çəkidə ilk mərhələdən azad olan Ramin Qurbanov mübarizəyə 1/16 finaldan qoşulub. Qurbanov, özü kimi, bu mərhələdən yarışa qatılan portuqaliyalı Çelio Diasla qarşılaşıb. Görüş həmyerlimizin inamlı qələbəsi ilə bitib. Qurbanov 70-ci saniyədə ipponla mərhələ adlayıb. O, 1/8 finalda Kriştian Totla (Macarıstan) mübarizə aparıb. Təəssüf ki, Ramin yarışı vaxtından əvvəl dayandırıb. Tot şido xalı ilə 1/4 finala yüksəlib.


100 kq çəkidə Azərbaycanın iki güclü cüdoçusu çıxış edir. Həmyerlilərimizdən öncə mübarizəyə Elxan Məmmədov qoşulub. Dünya çempionumuz 1/16 finalda Zlatko Kumriçlə (Xorvatiya) güləşib. Görüş idmançımızın asan qələbəsi ilə yekunlaşıb. Məmmədov 145-ci saniyədə rəqibini ippona salıb. O, 1/8 finalda Lukas Krpaleklə münasibətinə aydınlıq gətirib. Lakin Elxan bu dəfə ümidləri doğrultmayıb. O, ipponla uduzub.


Bayraqdarımız Elmar Qasımov isə 1/16 finalı azarkeş qismində keçirib və növbəti mərhələdə Jorje Fonseka (Portuqaliya) ilə üz-üzə gəlib. Lakin Azərbaycan millisinin lideri gözlənilmədən məğlubiyyətə üzülüb. O, qarşılaşmanın başa çatmasına 24 saniyə qalmış ippona düşüb.


+100 kq çəkidə ölkəmizi təmsil edən Uşanqi Kokauri 1/16 finalda Matyaz Çerayla (Sloveniya) qarşılaşıb və döyüşünü qələbə ilə bitirib. O, görüşün başa çatmasına 57 saniyə qalmış rəqibini ippona salıb. Cüdoçumuz 1/8 finalda gürcüstanlı Levani Matiaşvilini sınağa çəkib. Təəssüf ki, bu dəfə Kokaurinin özü ippona düşərək, Oyunlardakı çıxışını başa vurub.


78 kq çəkidə millimizin üzvü Günel Həsənli 1/16 final mərhələsində dünya və Avropa çempionatlarında dəfələrlə iştirak etmiş Assunta Qaleone (İtaliya) ilə münasibətlərinə aydınlıq gətirib. Lakin onun debütü uğurlu alınmayıb. 92-ci dəqiqədə ippona düşən idmançı yarışa vaxtından əvvəl vida edib.


Qeyd edək ki, cüdo yığmamızın aktivində 1 gümüş medal var. 60 kq çəki dərəcəsində Orxan Səfərov yalnız finalda məğlub olub.