Açılış mərasiminin keçiriləcəyi Bakı Olimpiya Stadionuna insan axını başlayıb QAZİLER.AZ saytı məlumat verir ki, Lent.az-ın “buro247.az” saytına istinadən xəbərinə görə, açılış mərasimi Bakı vaxtı ilə saat 21:05-də Olimpiya Stadionunda keçiriləcək. Mərasim dünya miqyaslı iki bədii direktor və onların xüsusi yaradıcı komandaları tərəfindən təqdim olunacaq. Açılış mərasiminin bədii direktoru Dimitris Papaioannou, Afina 2004 Olimpiya Oyunlarının açılış və yekun mərasimlərinin yaradıcısıdır.
Açılış mərasimi 12 hissədən ibarət olacaq.
Salamlama: Mərasim Alim Qasımovun bədahətən ifa etdiyi muğamla başlayacaq. 50 nağaranın ritmik sədaları altında 24-dən sıfıra geriyə saymaq Azərbaycanın dövlət müstəqilliyinin bərpasının 24 illiyini göstərir. Səhnə 1000 nəfərə yaxın rəqqasənin Azərbaycanın dünyaca məşhur xalılarının şərəfinə naxışlarla işlənmiş paltarlarının ətəklərilə örtülür.
Odlar yurdu: Şeypurun sədaları prezident İlham Əliyev, birinci xanım Mehriban Əliyevanı və Avropa Olimpiya Komitəsinin prezidenti Patrik Hikkini salamlayır. Azərbaycanın dövlət bayrağı qaldırılır və himni səsləndirilir.
İlk alov: Avropa Oyunlarının aprelin 26-da Atəşgah məbədində alovlandırılan, həmin gündən 1000-dən çox məşəlçinin daşıdığı, təxminən 5500 km məsafə qət edən məşəl bu axşam sonuncu məşəlçinin stadiona daxil olması ilə başa çatacaq.
Miniatürlər bağı: Dahi şair Nizaminin əlində tutduğu tərəzinin hər gözündə bir kukla fiquru var. Onlar Azərbaycan ədəbiyyatının məşhur incilərindən birinin qəhrəmanları olan nakam sevgililər - Leyli və Məcnundur. O. "Miniatürlər bağı"nın mürəkkəb elementləri və canlı rənglərilə tamaşaçıları öz dünyasına aparacaq.
Nar: Nar sevgi nişanəsi, uğurun mücəssəməsi və Azərbaycanın rəmzidir. Əlli bayraq: Bu, 50 ölkəni təmsil edən təxminən 6000 idmançı üçün ağır məşqlər dövrünün geridə qaldığını və Oyunların həyəcanının qarşıda durduğu andır. Xalqların paradı Olimpiya oyunlarını dünyaya bəxş etmiş ölkəyə hörmət əlaməti olaraq Yunanıstan öndə olmaqla başlayır. Paradı ev sahibi Azərbaycan başa vurur.
Bir bayraq: Stadiona Avropa Olimpiya Komitəsinin bayrağını Avropanın müxtəlif yerlərindən olan səkkiz tanınmış qadın və kişi idmançı gətirir. Bir bayraq Avropa Olimpiya Komitəsinin bu axşam stadiona toplaşmış 50 üzvünü təmsil edir.
Birlik: Avropa Nüvə Tədqiqatları Təşkilatı (CERn) 60 ildən çoxdur xalqları elm zəminində sülhə gətirir. Avropa Oyunları beynəlxalq birliyin idmandan qaynaqlanan yeni alovudur. Böyük adron sürətləndiricisi 100-dən çox fizik və mühəndisin cəmləşdiyi qurumun - Avropa Nüvə Tədqiqatları Təşkilatının əsas məhsuludur.
Avropa və buğa: Texnologiya dünyasından əfsanələr aləminə, Kainatın yaranışını dərk etməkdən qitəmizin adının mənşəyini anlamağadək. Əfsanəvi şərq şahzadəsinin şərəfinə adlandırılan Avropa hekayəsi yada salınır.
Oyunlar başlansın: Mehriban Əliyeva və Patrik Hikki nitq söyləyir. Ardınca prezident İlham Əliyev Oyunları rəsmə şəkildə açıq elan edir.
Mənşələr: Yazın gəlişini simvolizə edən Novruz - Azərbaycanın ən əlaçətdar bayramıdır. Novruzun ardınca Küləklər şəhəri Bakı, Yanardağ, Qobustanın hekayəsi canlanacaq.
"Yallı": Bu axşamın ifaçıları (təxminən 2000 nəfər) səhnəyə toplaşaraq, mərasimi sevinclə başa çatdırırlar. Onlar "Yallı" rəqsini oynayırlar.
***
17:24
Bakıda keçiriləcək I Avropa Oyunlarında iştirak etmək üçün 10 minlərlə insanın Bakı Olimpiya Stadionuna axını başlayıb. Lent.az-ın ərazidə olan əməkdaşının verdiyi məlumata görə, həm stadionun içində, həm də kənarında güclü təhlükəsizlik tədbirləri görülüb. Bir neçə yoxlama mərhələsindən sonra tamaşaçılar stadiona buraxılır.
Qeyd edək ki, bu gün I Avropa Oyunlarının rəsmi açılış mərasimidir. 12-28 iyun tarixlərində keçiriləcək Bakı-2015 Avropa Oyunları qitə üçün çoxsaylı idman növləri üzrə ilk dəfə keçiriləcək yarışlar olacaq.
Bakı-2015 Avropa Oyunları ümumilikdə 20 idman növü üzrə keçiriləcək: bunlardan 16-sı olimpiya, 4-ü qeyri-olimpiya idman növündə olacaq. Yarışlarda Avropanın müxtəlif ölkələrindən təxminən 6000 idmançı 17 yarış günü müddətində öz ölkələrini təmsil edəcək. On iki idman növü 2016-cı il Rio-de-Janeyro Olimpiya Oyunları üçün seçmə yarışlara imkan yaradacaq.
Birinci Avropa Oyunlarının keçirilməsini 2012-ci ilin dekabr ayında Avropa Olimpiya Komitəsi (AOK) Bakı şəhərinə həvalə edib. İki il yarımdan sonra Bakı dünyanın ən yeni əsas idman tədbirini həyata keçirməyə hazır olub.
Azərbaycanın prezidenti İlham Əliyevin qədim Atəşgah məbədində yandırdığı məşəl 48 gün dayanmadan xalqın ən sevimli idman qəhrəmanları və mədəniyyət xadimləri tərəfindən səyahət etdirilib. 60 regionu gəzən məşəl təxminən 5500 km məsafəni qət edib.
Yerli vaxtla saat 20.15-də başlanacaq açılış mərasimində bir sıra xarici dövlətlərin başçıları, rəsmi şəxslər iştirak edəcəklər.
