Azərbaycan Dövlət İqtisad Universitetində (ADİU) “Məzun Günü” keçirilib. Tədbirdə Qiymətli Kağızlar üzrə Dövlət Komitəsinin sədri Rüfət Aslanlı, Təhsil Nazirinin müavini Ceyhun Bayramov, Hesablama Palatasının sədri Vüqar Gülməmmədov, “Bank Standard”ın Müşahidə Şurasının sədri Kamal İbrahimov, universitetin professor- müəllim heyəti, tələbələr və valideynlər iştirak ediblər.

ADİU-nun mətbuat xidmətindən QAZİLER.AZ-a verilən məlumata görə, mərasimdə çıxış edən Universitetin rektoru Ədalət Muradov məzunları təbrik edərək, onlara gələcək fəaliyyətlərində uğurlar arzulayıb.

Sonra ADİU-nun fəxri məzunları – Rüfət Aslanlı, Ceyhun Bayramov və Vüqar Gülməmmədov tələbəlik xatirələrini məzunlarla bölüşərək ADİU-nun əldə etdiyi nailiyyətlərdən danışıblar.



Mərasimdə universitetin ən yüksək bal toplayan məzunu Zeynəb Dadaşovaya hədiyyə təqdim olunub. Universitet himninin sədaları altında bütün məzunlara rəmzi diplomlar təqdim edilib.
Qeyd edək ki, 2014-2015-ci tədris ilində ADİU-nu 3190 bakalavr və 621 magistr bitirib.