“Qarabağ Qaziləri” İctimai Birliyi Milli Qəhrəman Mübariz İbrahimov adına Rəsm Qalereyası ilə birgə təşəbbüsə imza atıb.

Məlum olduğu kimi, sözügedən Rəsm Qalereyasında milli qəhrəmanlar, Qarabağ müharibəsi iştirakçılarının – qazi və şəhidlərimizin rəsmləri və büstləri sərgilənir. Elə rəsm əsərləri və büstlər var ki, məhz bu qalereyada hazırlanıb. “Qarabağ Qaziləri” İB-nin mərhum sədri, Baş Qazi Etimad Əsədovun büstünün açılışı və saniyələr içində ərsəyə gələn rəsminin açılışı da bu qalereyada gerçəkləşmişdi. Aldığımız məlumata görə, “Qarabağ Qaziləri” İB-nin Xətai rayon şöbəsi Rəsm Qalereyası ilə birgə şəhid və qazilərimizin, milli qəhrəmanların rəsm əsərlərini və büstləri cəbhə bölgəsinə aparıb. İB-nin Xətai rayon şöbəsinin sədri, Qarabağ qazisi İlham Həsənov “Şərq.az”a bildirdi ki, bu səpkili tədbirlər artıq bir müddətdir ki, təşkil olunur:

Bu tədbirlər Müdafiə Nazirliyinin xətti ilə təşkil olunur. Şəhid və qazilərimizi cəbhə bölgəsində düşmənlə üz-üzə dayanmış əsgərlərimizlə “görüşdürürük”. Hesab edirik ki, belə tədbirlər əsgərlərimizi daha da ruhlandırır. Həmçinin gənclərdə vətənpərvərlik hissinin güclənməsinə xidmət edir. Artıq Ağdamın Quzanlı qəsəbəsindəyik. Burada 2 hərbi hissədə əsgərlərlə görüşümüz oldu. Əsgərlərimizə bayram arzularımızı çatdırdıq. Rəsm əsərlərini nümayiş etdirdik. Sabah Ağdam İdman Olimpiya Kompleksində kinq-boks üzrə beynəlxalq yarış keçiriləcək. Kompleks binasında rəsm əsərləri və qəhrəmanlarımızın büstlərindən ibarət sərginin açılışı olacaq və yarış iştirakçıları xalqımızın qəhrəman oğullarını tanıyacaqlar.

İ.Həsənov aprel ayının 21-də Rəsm Qalereyasında Milli Qəhrəman Allahverdi Bağırovun xatirəsinə anım tədbiri keçiriləcəyini bildirdi.

Məlahət