Sabunçu Rayon Məhkəməsində baş tutan iclasda hökm oxunub.

Hökmə əsasən general Sübahir Qurbanov 14 il, Teymur Quliyevin 12 il, Füzuli Əliyev 14 il, Natiq Əliyev 10 il 6 ay, Zaur Məmmədov 10 il 6 ay, Anar Şirəliyev 3 il, Eşqin Əliyev isə 3 il müddətinə azadlıqdan məhrum ediliblər.

Fərhad Atayev və Elşad Əzizov barəsində 3 il sınaq müddəti olmaqla 70-ci (şərti) maddə tətbiq edilib. Onlar məhkəmə zalından azadlığa buraxılıblar.

Ev dustaqlığında olan general Natəvan Mürvətova barəsində də şərti cəza təyin edilib, 5 il sınaq müddəti olmaqla şərti cəza çıxarılıb.

***

MTN generalı Sübahir Qurbanova hökm oxunub.

Hökmə əsasən general Sübahir Qurbanov 14 il müddətinə azadlıqdan məhrum edilib.

***

Ləğv edilmiş Milli Təhlükəsizlik Nazirliyi Monitorinq Mərkəzinin sabiq rəisi, general-mayor Teymur Quliyev, Transmilli İqtisadi Cinayətkarlığa Qarşı Mübarizə Baş İdarəsinin sabiq rəisi, general-mayor Sübahir Qurbanov, Əməliyyat-Texniki İdarəsinin rəisi, general-mayor Natəvan Mürvətova, həmin qurumun digər vəzifəli şəxsləri Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun cinayət işi üzrə məhkəmə iclası davam edir.

Cinayət işi Bakı Hərbi Məhkəməsinin sədri hakim Həbib Həsənovun sədrlik etdiyi kollegiyada Sabunçu rayon Məhkəməsinin inzibati binasında araşdırılır.

Musavat.com xəbər verir ki, bu gün keçiriləcək növbəti məhkəmə iclasında hökm oxunacağı gözlənilir.

Artıq ev dustaqlığında olan Natəvan Mürvətova məhkəmə binasına gəlib.

Məhkəmə prosesi qapalı keçirilir.

Qeyd edək ki, dövlət ittihamçısı çıxış edərək general Sübahir Qurbanovun 16 il, Teymur Quliyevin 16 il, Natəvan Mirvətovanın 12 il, Füzuli Əliyev 15 il, Natiq Əliyev 14 il, Zaur Məmmədov 13 il, Elşad Əzizov 8 il, Fərhad Atayev 7 il , Anar Şirəliyev 7 il, Eşqin Əliyevin 7 il müddətinə azadlıqdan məhrum edilməsini istəyib.

Prokuror təqsirləndirilən şəxslərin hər birinin hərbi rütbələrindən azad olunmasını istəyib. Bunun üçün generallarla bağlı prezidentə, digər rütbəli şəxslərlə bağlı müvafiq qurumlara təqdimat verilməsini istəyib. Dövlət Təhlükəsizlik Xidmətinin 1 milyon manatlıq mülki iddiasının təmin olunmasını istəyib.

İttihama görə, ləğv olunmuş Milli Təhlükəsizlik Nazirliyinin sabiq baş idarə və idarə rəisləri Sübahir Qurbanov, Teymur Quliyev, Natavan Mirvətova, eləcə də həmin qurumun digər vəzifəli şəxsləri - Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun 2004-2015-ci illər ərzində mütəşəkkil dəstə tərkibində xidməti vəzifələrinin icrası ilə əlaqədar hakimiyyətdən və öz qulluq mövqelərindən sui-istifadə ediblər.

Dəstə üzvləri sahibkarlara psixi və fiziki zorakılıq göstərməkdə, sərbəst buraxılmaları müqabilində həbsə alma və barələrində rüsvayedici məlumatlar yayma hədəsi ilə külli miqdarda pul tələb etmədə ittiham edilirlər.

Bildirək ki, bu "MTN işi" üzrə sonuncu məhkəmə işidir.

Musavat.com