Tələbə Qəbulu üzrə Dövlət Komissiyası (TQDK) imtahan rəhbərləri və zal nəzarətçilərinin təlimat qaydalarını mənimsəmə səviyyəsinin onlayn qaydada yoxlanılmasına başlayıb.

TQDK-ın mətbuat xidmətindən Lent.az-a verilən məlumata görə, qəbul imtahanlarında imtahan rəhbəri və zal nəzarətçisi kimi cəlb olunan şəxslərin seçilməsi, onların üzərinə düşən vəzifələrin yerinə yetirmə bacarığının yoxlanılması, peşəkarlığının artırılması, imtahan təlimatını dərindən mənimsəmələrinə stimulaşdırılması məqsədilə imtahan keçiriləcək.

TQDK-nın rəsmi internet saytı vasitəsi ilə onlayn rejimdə təşkil olunan imtahanda iştirakçılara 35 test tapşırığı təqdim olunacaq. Heç bir vaxt məhdudiyyəti tətbiq edilməyəcək.

İmtahan rəhbərləri və nəzarətçilərin bir daha tanış olmaq imkanlarının olması üçün hər bir imtahan növü üzrə təlimatlar sistemdə yerləşdirilib.
İmtahanda TQDK-nın müvafiq bazasına daxil edilmiş 950 nəfərə yaxın imtahan rəhbəri, 14440 nəfər zal nəzarətçisi iştirak edəcək.

Məlumat üçün bildirək ki, imtahan rəhbərləri TQDK tərəfindən ali və orta ixtisas təhsili müəssisələrində, müxtəlif dövlət orqanlarında və Azərbaycan Milli Elmlər Akademiyasında pedaqoji və məsul vəzifələri icra edən şəxslər arasından seçilirlər. Zal nəzarətçiləri isə orta ümumtəhsil müəssisələrindən dəvət olunurlar.