Ləğv olunmuş Milli Təhlükəsizlik Nazirliyinin (MTN) sabiq baş idarə və idarə rəisləri - general-mayor Sübahir Qurbanov, general-mayor Teymur Quliyev, general-mayor Natavan Mirvətova, eləcə də həmin qurumun digər vəzifəli şəxsləri Füzuli Əliyev, Zaur Məmmədov, Natiq Alıyev, Fərhad Atayev, Anar Şirəliyev, Eşqin Əliyev, Elşad Əzizovun cinayət işi üzrə maraqlı detallar ortaya çıxmaqdadır.

Lent.az-ın ittiham aktına istinadən məlumatına görə, MTN əməkdaşları sahibkarlıq fəaliyyəti ilə məşğul olan Cəbrayılov Zaur Münasib oğlu, Ağamalıyev Xəqani Bayram oğlu, Şıxəliyev Raqib Əli oğlu və Əliyev Sənan Əliqardaş oğlunu qanunsuz azadlıqdan məhrum edərək onlara qarşı quldurluq edib, hədə-qorxu ilə pul alıblar.

Zərərçəkmiş şəxs qismində tanınmış Cəbrayılov Zaur Münasib oğlu ifadəsində bildirib ki, 2002-ci ildən kirayə götürdüyü müxtəlif yük maşınları ilə Rusiya Federasiyasının Pyatiqorsk şəhərindən yüklərin Azərbaycana daşınması ilə məşğul olub. O, Rusiyaya isə Azərbaycandan geyim malları aparıb. Apardığı və gətirdiyi mallar müxtəlif sahibkarlara məxsus olub: “2013-cü ildə adıma yazılan 1000 rubl cəriməni ödəmədiyim üçün Rusiyadan 2018-ci ilin may ayının 1-nə kimi deportasiya olunmuşam. Lakin deportasiya qərarının verilməsinə baxmayaraq qərar sistemə oturulmadığından 2015-ci ilin noyabr ayına kimi gedib-gəlmişəm. İşimiz Azərbaycanda fəaliyyət göstərən sahibkarların mallarını Pyatiqorsk şəhərindən gətirilmək olub. Hər dəfə buna görə 400-500 ABŞ dolları pul qazanmışam. 2015-ci ilin sentyabr ayının sonu Pyatiqorsk şəhərində olan anbardan sahibkar Ağamalıyev Xəqani Bayram oğluna məxsus saç boyasının, Raqib adlı sahibkarın həşəratların məhv edilməsi üçün nəzərdə tutulmuş vasitələrinin, Sənan adlı sahibkarın şampunlardan ibarət malını götürmək üçün Pyatiqorska xalam oğlu Şəmsi Yusifovla, sürücü “Baba” ləqəbli Tovuz rayon sakini ilə birlikdə mənə məxsus “Mercedes Vario” markalı, 90-UC-524 dövlət qeydiyyat nişanlı maşınla getdik. Bakıdan çıxanda maşına yük vurduq. Qazax rayonu ərazisində yerləşən “Qırmızı körpü” sərhəd-keçid məntəqəsinindən sərhəddən keçdik, oradan da Vladiqafqaz gömrük məntəqəsində sənədlərimizi yoxladılar və ölkəyə daxil olmağıma stop qoyulduğunu bildik. Məcbur olub Qazax rayonu ərazisində yerləşən “Qırmızı körpü” sərhəd-keçid məntəqəsinin yaxınlığında olan otelə qayıtdım. Xalam oğlu Şəmsi və “Baba” ləqəbli sürücü malları götürmək üçün getdilər. Təxminən 3 gün sonra maşına Ağamalıyev Xəqani Bayram oğluna məxsus saç boyasını, Raqib şəxsə məxsus həşaratların məhv edilməsi üçün nəzərdə tutlumuş vasitələri, Sənan adlı sahibkarın şampunlarını yığıb gəldilər və məni də oteldən götürdülər. Birlikdə Bakı şəhərinə yola düşdük. Tovuzdan keçəndə sürücünün əmisi oğlunu da yoldan götürdük. O, uşağın da təxminə 20 yaşı vardı”.

Zərərçəkən şəxs istintaqa verdiyi ifadəsində bildirib ki, Qaradağ postuna çatan zaman “Hyundai” markalı avtomobil onları yolun soluna çəkərək saxla əmri verib: “Maşından düşən kimi 38-40 yaşlarında, hündürboy, orta bədən quruluşlu, sonradan adının Teymur olduğunu bildiyim şəxs Milli Təhlükəsizlik Nazirliyinə məxsus xidməti vəsiqəsini göstərərək bizi nazirliyə dəvət etdi. Onun maşınına mindim. Avtomobildə cavan bir oğlan da vardı, Teymur isə qabaqda əyləşmişdi. Yolda söhbət əsnasında bildim ki, Teymur Ağdam rayonundandır. Xalamoğlunun və sürücümüzün hansı maşınla getdiyini görmədim. Nazirliyə çatanda gecə saat 3 olardı. Bizdən heç bir sənəd istəmədilər. Birbaşa ikinci mərtəbəyə qaldırdılar. Otaq balaca idi. Çatan kimi Teymur telefonla kimlə danışmışamsa, hamısının siyahısını mənə göstərdi. Malların kimə məxsus olduğunu soruşdu, dedim. Başa düşdüm ki, bütün danışıqlarıma qulaq asıblar.

Sonra Teymur maşından dövriyyəsi qanunsuz olan ürəkləri istədikləri hər bir əşyanı tapa biləcəklərini, hətta qaçaqmalçılıq yolu ilə saxta “Calqon” yuyucu vasitələrinin keçirildiyi ilə bağlı sənəd hazırlaya biləcəklərini bildirərək hədə-qorxu gəlməklə izahat yazmamı tələb etdi. Mən heç bir zaman qaçaqmalçılıq yolu ilə ölkəyə mal gətirmədiyimi dedim. Teymurun hədələrindən qorxaraq onun diqtəsi ilə izahat yazdım. Həmin izahatda vaxtilə saxta “Calqon” yuyucu vasitələrini respublika ərazisinə gətirdiyimi və həmin malların sahiblərinin Xəqani, Sənan və Raqib olmasını göstərdim”.

Zərərçəkən şəxs qeyd edib ki, səhərə yaxın malların sahibi olan Xəqani, Raqib və Sənanı da MTN gətiriblər: “Onları digər otağa apararkən gördüm Təxminən saat 09 radələrində 55 yaşlarında, hündürboylu, orta köklükdə, rus dilli, sarışın bir şəxs mənim olduğum otağa daxil oldu. Onunla danışanda bildim ki, həmin şəxs şuşalıdır, rütbəsinin isə polkovnik və ya polkovnik-leytenant olmasını bildim. Həmin şəxs azadlığa buraxılmağım üçün 50.000 ABŞ dolları verməli olduğumu bildirdi. Lakin uzun söhbətdən sonra 20.000 ABŞ dollarına razılaşdıq. Bundan sonra Teymur otağa daxil oldu və onun telefonu ilə qardaşım Səbuhiyə zəng edib evimdə olan 10.000 ABŞ dolları, həmçinin əlavə 10.000 ABŞ dolları tapıb, 20.000 ABŞ dolları düzəldərək Milli Təhlükəsizlik Nazirliyinə gətirməsini tapşırdım. Bundan təxminən 1 saat keçmiş, Teymur qardaşım Səbuhinin 20.000 ABŞ dollarını gətirib verdiyini və saat məni 13:00-da buraxacaqlarını dedi. Teymurun dediyi kimi saat 13:00-da məni, Şəmsini, “Baba” ləqəbli sürücünü və sonuncunun əmisioğlunu buraxdılar. Ordan maşını götürüb Sədərək Ticarət Mərkəzinə gəldim, Xəqani, Raqib və Sənanla söhbət elədim. MTN–də Xəqanidən 20.000 ABŞ dolları, Raqibdən 1500, Sənandan isə 2500 ABŞ dolları aldıqlarını bildim”.

Digər zərərçəkən şəxs Ağamalıyev Xəqani Bayram oğlu ifadəsində göstərib ki, uzun müddət ticarətlə məşğul olub: “Bazarda işləyən zaman Cəbrayılov Zaur Münasib oğlu ilə tanış oldum. O, Rusiyadan malları gətirdi. Başladıq birlikdə iş görməyə. O, mənə kosmetik mallar gətirirdi. Hər dəfə üçün gətirdiyi malların miqdarından asılı olaraq Zaur Cəbrayılova zəhmət haqqı kimi 500-700 ABŞ dolları məbləğində pul vermişəm. Bir gün işə gedirdim. Yolda telefonuma zəng gəldi. Adının Teymur olduğunu dedi və özünü MTN-in əməkdaşı kimi təqdim elədi. Dedi, nazirliyə gəlim. Hətta telefonda mənə dedi ki, Zaur da burdadır. Maşınımı işdə qoydum, taksiylə MTN-ə getdim. Nazirliyə çatan zaman Teymur məni qarşıladı, heç bir sənəd tələb etmədən ikinci mərtəbəyə qaldırdı. Otağa girdik. Həmin otaqda bir masa və 3 oturacaq vardı. Başladı ki, Zaurun maşınında sənin malların var. Buna görə bizə pul verməlisən. Etiraz elədim. Dərhal keçdi hədə-qorxuya. Dedi ki, “istəyirsən sənin qanuni gələn malını qanunsuz gəlmiş kimi sənədləşdirək”. Bu sözdən sonra artıq tam başa düşdüm ki, bunlar hədə ilə pul istəyirlər. Mənim həmin maşında 10 min dollarlıq malım vardı. Teymur isə məndən 20 min dollar istədi. Dedim ki, heç olmaya malın dəyəri qədər pul verim. Razılaşmadı. 2 saat vaxt verdi. Gedib onun pulunu düzəltdim. Nazirliyinin yanında olan Mərkəzi Klinik xəstəxananın həyətində Teymurla görüşdüm və 20 min dolları ona verdim. Tapşırdı ki, bununla bağlı heç kimə heç nə demə, yoxsa başın ağıyar”.

Zərərçəkən şəxs Teymurun ondan 7 il qabaq da hədə-qorxuyla pul aldığını deyib: “Sədərək Ticarət Mərkəzində işləyirdim. Heç bir şikayət olmadan məni MTN-ə gətirtdirdi. Dedi, 15 min dollar verməlisən. Narazılığımı bildirəndə dedi ki, “əgər işləyib qazanırsansa, verməlisən”. Bir şey deyə bilmədim və pulu verdim”.

Zərərçəkmiş şəxs qismində dindirilən Şıxəliyev Raqib Əli oğlu bildirib ki, 2008-ci il tarixdən fərdi şəkildə sahibkarlıqla məşğul olub, Rusiyanın Pyatiqorsk şəhərindən həşaratlar və ziyanvericilərə qarşı dərmanlar, qadın saç boyaları gətizdirib və Azərbaycanda ayrı-ayrı dükanlara paylayıb: “Hər dəfəsində təxminən orta hesabla 2000-3000 ABŞ dollar pul qazanırdım. Malları əslən Şuşa şəhərindən olan, elə 2008-ci ildən tanıdığım və yaxın münasibətdə olduğum Cəbrayılov Zaur Münasib oğlu mənə gətirirdi. Hər reys üçün Zaura təxminən 300-500 ABŞ dollar məbləğində pul vermişəm. 2015-ci ilin sentyabr ayının axırlarında, oktyabr ayının əvvəllərində Zaur Rusiyadan mal gətirəcəkdi. Həmin ərəfədə Zaur həşəratlara qarşı dərmanlar, qadın saç boyalarını Pyatiqorsk şəhərindən milliyətcə rus olan Andrey və Sergey adlı tanışlarından götürməyi tapşırmışdım. Həmin rus tanışlarıma 2.000 ABŞ dolları məbləğində mal göndərmələrini telefonla sifariş vermişdim”.

Zərərçəkən şəxs qeyd edib ki, bir neçə gündən sonra ona tanımadığı nömrədən zəng gələrək MTN-ə gəlməli olduğunu deyiblər: “Telefonda dedilər, Zaur da burdadı. Başa düşdüm ki, mallar MTN tərəfindən saxlanılıb. Nazirliyə gəldim, məndən heç bir sənəd tələb etmədən ikinci mərtəbəyə qaldırdılar. 2 nəfər mülki geyimli nazirlik əməkdaşı sorğu suala keçdilər. Dedim, həmin avtomobildə mənim 2 min dollarlıq malım var. Həmin iki nəfər mülki geyimli şəxs məndən yazılı olaraq izahat aldılar və birbaşa pul istədilər. 2 min dollar tələb elədilər və dedilər ki, “hesab elə ki, bu reys mal gətirməmisən, həmin pulu bura ver!”. Danışıq tərzindən, səs tonundan başa düşdüm ki, gələcəkdə mənə sahibkarlıq fəaliyyətimdə mane yaradacaqlar. Axırda uzun sürən bazarlıqdan sonra 1.500 ABŞ dollarına razılaşdıq. Pulu gətirməm üçün buraxdılar. Pulu götürüb nazirliyin qarşısındakı dayancaqda MTN əməkdaşlarına verdim”.

İş üzrə zərərçəkmiş şəxs qismində dindirilmiş Babayev Namiq Rafiq oğlu 03.12.2015-ci il tarixli ifadəsində göstərib ki, 2014-cü ilin oktyabr ayında səhər tezdən yaşadığı evin həyətindən MTN-nin əməkdaşları onu nazirliyə aparıb, “Teymur” və “Fuad” adlı əməkdaşlar onu vergidən yayınmaqda, evində silah saxlamaqda ittiham edib hədə-qorxu gəlib, halı pisləşdiyindən Mərkəzi Klinik xəstəxanaya aparılıb, öz evində və qardaşı Emin Babayevin hər hansı qərar təqdism edilmədən axtarış aparılıb, bir sutka qanunsuz MTN-də saxlanılıb, “Teymur” adlı əməkdaş ondan 50.000 manat tələb etsə də 30.000 manata razılaşıb və həmin pulu borc alaraq aparıb ona verib.

İttiham aktındakı materiallardan aydın olur ki, sahibkarlıq fəaliyyəti ilə məşöul olan yuxarıdakı şəxslərin qeyri-qanuni dinlənilməsi və müəyyən məbləğ qarşılığında haqlarında açılmış işin bağlanılması barədə sabiq nazir Eldar Mahmudovun da xəbəri olub.

İttiham aktında deyilir: “MTN-in rəhbərliyinin göstərişi ilə Xəqani və Ramin qardaşları MTN-ə dəvət olunub, aparılmış profilaktik söhbətlər zamanı onlar ermənilərlə ticarət əlaqələrinin olmasını etiraf edərək gələcəkdə bu əlaqələrinin təkrar olunmayacağını bildiriblər. Həmçinin, Zaur Cəbrayılov və Şəmsi Yusubov növbəti dəfə Pyatiqorsk şəhərindən ölkəmizə yük gətirərkən MTN rəhbərliyinin göstərişi əsasında saxlanılıb və nazirliyə gətirilərək onların izahatları alınıb. Onlar ermənilərlə işbirliyində olduqlarını, sonuncuların kustar üsulla hazırladıqları yuyucu tozlar, saz boyaları, şampunlar və digər məhsulları Bakı şəhərində Raqib Şıxəliyev, Ramin və Xəqani Aramalıyev qardaşları vasitəsilə realizə etdiklərini səmimi etiraf ediblər. Materiallar baş idarənin sabiq rəisi Əsədullayev Ədalət Hğseyn oğlu tərəfindən Eldar Mahmudova məruzə olunub, sonuncunun göstərişi əsasında həmin şəxslərə ermənilərlə əlaqələrinə, qanunsuz fəaliyyətlərinə son qoyulması bildirilib və bu istiqamətdə araşdırma 24.10.2015-ci ildə dayandırılıb”.

Həmçinin, sənədlərdən o da məlum olur ki, adıçəkilən iş adamlarının telefonlarının qeyri-qanuni dinlənilməsi də Eldar Mahmudovun əmri ilə baş tutub.