Heydər Əliyevin vəfatının on üçüncü ildönümü münasibətilə İqtisad Universitetinin (UNEC) rektoru, professor Ədalət Muradov və ali məktəbin professor-müəllim heyəti Fəxri Xiyabanı ziyarət ediblər. UNEC-in mətbuat xidmətindən QAZİLER.AZ-a verilən məlumata görə, UNEC kollektivi Heydər Əliyevin məzarı önünə əklil qoyub, xatirəsini ehtiramla yad ediblər. Onlar həmçinin oftalmoloq, akademik Zərifə Əliyevanın məzarı üstünə də gül dəstələri düzüblər.

Anım tədbiri universitetdə davam etdirilib. Heydər Əliyevin xatirəsi bir dəqiqəlik sükutla yad edildikdən sonra “Dahi Şəxsiyyət” sənədli filmi nümayiş olunub.
YAP Səbail rayon UNEC ilk ərazi təşkilatının sədri, prorektor Mikayıl Zeynalov “Heydər Əliyev və vətənpərvərlik tərbiyəsi”ndən danışıb. O bildirib ki, müstəqil Azərbaycanın siyasi-ideoloji strategiyasında mühüm yer tutan və Heydər Əliyevin böyük dühasının bəhrəsi olan vətənpərvərlik təlimi müstəqil Azərbaycanın hərtərəfli inkişafının etibarlı təməlidir. M.Zeynalov Heydər Əliyevin tövsiyə etdiyi əsl vətənpərvərliyin təməlində hər zaman Azərbaycan naminə çalışmaq, onun hərtərəfli yüksəlişinə səy göstərmək, milli-mənəvi dəyərləri qorumaq, Vətən və xalq qarşısında borc və məsuliyyəti dərk edib əməli fəaliyyətdə rəhbər tutmaq olduğunu vurğulayıb.

O qeyd edib ki, hazırda ölkədə bütün digər sahələrlə yanaşı, vətənpərvərlik prinsiplərinin ardıcıl və əhatəli şəkildə həyata keçirilməsində də Heydər Əliyevin siyasi kursuna dönmədən əməl olunur, Vətənin və xalqın hərtərəfli yüksəlişi üçün misilsiz işlər görülür.

UNEC-in “İqtisadiyyatın tənzimlənməsi” kafedrasının müdiri, professor Məhiş Əhmədov “Heydər Əliyev və multikultural dəyərlər” mövzusunda çıxış edib. Azərbaycanda tolerantlığı dövlət siyasətinə çevirən Heydər Əliyevin ölkədə multikulturalizmin inkişafı sahəsində xidmətlərinin dərindən öyrənilməsi olduğunu bildirib. O, Heydər Əliyevin müəyyənləşdirdiyi azərbaycançılıq məfkurəsinin özündə multikulturalizm və tolerantlıq ideyasını əks etdirdiyini xüsusi vurğulayıb.