Bəli, Ağdamın yeni fotoları yayıldı...Bunu biz QAZİLER.AZ saytı olaraq yeni başladığımız Bura vətəndir! – layihəmiz çərçivəsində yayırıq. Amma Sizlər bu fotolarda Ağdamın işğalından sonra düşmən tapdağında qalan, yandırılıb külə dönən evlərin, dövlət binalarının, mədəniyyət və tarixi obyektlərin, uşaq bağçalarının, məktəblərin, ticarət mərkəzlərinin xarabalıqlarını görməyəcəksiniz. Biz sizə 1993-cü ildən bəri rayonun Quzanlı qəsəbəsi də daxil olmaqla 43 kənddə yaradılan, qurulan, yaşayan YARIMCAN AĞDAMın fotolarını təqdim edirik. Düşündük ki, işğal, soyqırım, faciə, kədər fotolarımızla yanaşı, insanlarımızın yaşayıb yaratdığının da təsvirini görmək lazımdır. Buyurun baxın! Bura düşmənlə üz-üzə dayanan, çalışan, yaşayan, döyüşən Ağdamdır!

1993-cü il, iyulun 23-də Ağdam rayonunun, şəhər də daxil olmaqla, böyük bir hissəsi ermənilər tərəfindən işğal olunub. Erməni işğalçılarına qarşı döyüşlərdə beş mindən çox ağdamlı şəhid olub!

Bu gün Ağdamın icra başçısı Qarabağ müharibəsi iştirakçısı, geniş idarəetmə və dövlətçilik təcrübəsi olan, gecə-gündüz rayonun inkişafını düşünən, çalışan Raquf Məmmədovdur. Hazırda bir çox yeni projelərlə yanaşı, R.Məmmədovun şəxsi təşəbbüsü ilə Ağdamın arxitektura simvollarından biri sayılan, vaxtı ilə Ağdam şəhərində Azərbaycanın görkəmli alimi Xudu Məmmədovun layihəsi üzrə inşa edilən “Çay evi”nin oxşarı tikilir.

Rayonda bir çox qeyri – hökumət təşkilatlarının, o cümlədən “Qarabağ qaziləri” birliyinin Ağdam rayon filialı fəaliyyət göstərir. Filiala Qarabağ qazisi Şamil Əbilov rəhbərlik edir.







































Ağdam haqqında ümumi məlumat

Ağdam rayonu 1930-cu ildə yaradılıb. Sahəsi 1094 kvadrat km olan rayonun relyefi əsasən düzənlik, qismən dağlıqdır. Ağdam rayonu Azərbaycanın qədim, füsunkar təbiətli torpağı olan Qarabağın mərkəzində – Qarabağ dağ silsiləsinin şimal-şərq ətəklərində, Kür-Araz ovalığının qərbində yerləşir. Gözəl Qarabağın ürəyi sayılan Ağdamın qədim tarixi abidələri minillik keşməkeşli illərdən keçərək bu günə qədər gəlib çatmışdır. “Ağdam” sözü qədim türk dilində “kiçik qala” deməkdir. Uzaq keçmişdə bu ərazidə yaşamış türkdilli qəbilələr özlərini müdafiə etmək üçün əsasən kiçik qalalar tikirdilər. Zaman keçdikcə bu şəhərin adının mənası dəyişib. XVIII əsrin birinci yarısında Qarabağlı Pənahəli xan bu şəhərdə özü üçün ağ daşdan imarət tikdirmək barədə əmr verib. Həmin imarət uzun müddət ətraf kəndlərin sakinləri üçün bir növ oriyentirə çevrilib. Bu mənada “Ağdam” – günəş şüaları ilə nurlanmış işıqlı, ağ ev deməkdir. Ağdam rayonunda çoxlu sayda tariximizin şahidi olan mеmarlıq abidələri var. Ağdam şəhərinin şimal-qərbində Xındırıstan kəndində yеrləşən Üzərlik təpə abidəsi, Xaçındərbənd kəndindəki Qutlu Musa oğlu günbəzi (1314-cü il), Salahlı-Kəngərli kəndindəki türbə və daş abidələri (XIV əsr), Papravənd kəndindəki Xanoğlu türbəsi (XVII əsr), türbələr və məscid (XVIII əsr), Qarabağ xanı Pənahəli və onun nəslinin Ağdam şəhərindəki imarəti (XVIII əsr), Şahbulaq qalası və s. mеmarlıq abidələri bu yurdun qədim Azərbaycan torpağı olduğunu təsdiq еdir. Tariximizin sirdaşı, еv ünvanı olan bu abidələr Ağdamın kеçmişinin qaranlıqlarına işıq saçaraq dünənindən bu gününə soraq vеrir. Rayonun ərazisində 50-ci illərdən başlayaraq aparılan arxeoloji tədqiqat işləri zamanı məlum olmuşdur ki, Ağdamın ərazisi qədim insanların yaşayış məskənlərindən biridir. Tanınmış arxeoloq İdeal Nərmanovun Üçoğlantəpə deyilən yerdə apardığı arxeoloji tədqiqatlar zamanı aydın oldu ki, ilk qədim insanlar rayon ərazisində altı-səkkiz min il bundan əvvəl, yəni, Eneolit dövründə (e.ə. IV-VI minilliyi əhatə edir, “misdaş” dövrü adlanır) yaşamış, qədim əkinçilik və maldarlıq mədəniyyətinə bələd olmuşlar. Alim rayonun digər ərazilərində qədim yaşayış məskəni olmuş Leylatəpə və Üzərliktəpə deyilən yerlərdə apardığı arxeoloji tədqiqatlar zamanı Eneolit və orta Tunc dövrünə aid (e.ə. II minilliyin birici yarısı) dulusçuluq, metaləritmə, zərgərlik və digər sahələrə aid maddi-mənəvi abidələr aşkar edib. Burdan tapılan taxıl və üzüm dənələri bir daha sübut etmişdir ki, yerli əhali oturaq həyat keçirmiş və yüksək əkinçilik mədəniyyətinə malik olmuşdur. Arxeoloqlar Üzərriktəpədə apardıqları tədqiqatlar nəticəsində tapılan maddi-mədəniyyət qalıqlarına əsaslanaraq qeyd edirlər ki, bura Qafqazda ilk şəhər tipli yaşayış məskəni və Zaqafqaziyada ən zəngin abidələri olan yerlərdən biri olmuşdur. 80-cı illərin ortalarında rayonun Sarıçoban kəndi yaxınlığında son Tunc və Dəmir dövrünə aid (e.ə. XIX-XIII əsrləri əhatə edir) möhtəşəm kurqan tarixi cəhətdən çox qiymətli bir abidədir. Kurqanda aşkar edilən e.ə. XII-XIII əsrlərə aid maddi tapıntılar bu abidənin varlı bir insanın qəbri olduğundan xəbər verir. Bu isə həmin dövrdə Azərbaycanda ibtidai-icma quruluşunun dağılaraq sosial və əmək bərabərsizliyinin yaranmasına ən yaxşı əyani sübutdur. Sonralar Azərbaycanda gedən tarixi proseslər nəticəsində ilk dövlət qurumları formalaşmağa başlayıb. Belə dövlətlərdən biri də Şimali Azərbaycanda yaranmış Albaniya quldar dövləti idi. Mənbələrin verdiyi məlumata görə, qədim Albaniya ərazisində 26 tayfa var idi ki, bunlardan biri yüksək mədəniyyətə malik olan Qarqarlar Ağdam ərazisindəki Qarqar çayı boyunca məskunlaşmışlar. Bu isə Ağdamın Azərbaycan ərazisində ilk formalaşan dövlət quruculuğunda mühüm rol oynadığını bir daha əyani sübut edir.

(Ağdam haqqında ümumi məlumat www.agdam-ih.gov.az saytından götürülüb)

Növbəti materialımız Füzuli rayonunun işğaldan azad olunmuş Horadiz qəsəbəsindən olacaq.