Qaz sayğacı evimin giriş qapısının qarşısında quraşdırıldığı üçün təhlükə yaradır.

Qaziler.az xəbər verir ki, bunu Yevlax rayonu Gülövşə kənd sakini, II Qarabağ müharibəsi iştirakçısı Mehman Vüqar oğlu Cümşüdlü yayımladığı videogörüntüdə qeyd edib.

“Bir ildən çoxdur “Azəriqaz”a müraciət etmişəm, amma problemi həll etmirlər. Neçə manat rüsumu varsa, ödəməyə hazıram, yetər ki, sayğac normal yerə köçürülsün”, - o, bildirib.

“Azəriqaz”dan məsələ ilə bağlı saytımıza verilən açıqlamada vətəndaşın probleminin araşdırılıb tez bir zamanda həll olunacağı bildirilib.

Qeyd edək ki, Mehman Cümşüdlü “Kəlbəcərin azad olunmasına görə”, “Cəbrayılın azad olunmasına görə”, “Döyüşdə fərqlənməyə görə”, “Şücaətə görə”, “Azərbaycan Ordusunun 100 illiyi (1918-2018) yubileyi medalı” və “Vətən müharibəsi iştirakçısı” medalları ilə təltif olunub.