"Azər İşıq" və "Azərsu"nun işçiləri bədbəxt hadisənin qurbanı olublar. QAZİLER.AZ Daxili İşlər Nazirliyinin rəsmi saytına istinadən xəbər verir ki, hər iki hadisə dekabrın 7-də qeydə alınıb.

Mingəçevir şəhərinin 20 yanvar küçəsində təmir işləri aparan şəhər Azər İşıq MMC-də işləyən İstiqat Yusifovun üzərinə işıq transformatoru düşüb. Onu xəstəxanaya çatdırmaq mümkün olsa da, orada ölüb.

İkinci hadisə isə Abşeronda baş verib. Abşeron rayonunun Saray qəsəbəsində Azərsu ASC-nin su anbarında qaynaq işləri aparan Sumqayıt şəhər sakini Həbib Qasımovun üzərinə dəmir boru düşüb. O, hadisə yerindəcə keçinib.

Hər iki hadisə ilə bağlı araşdırma aparılır.