Bərdənin daha 4 kəndinə mavi yanacaq verilib. Axar.az xəbər verir ki, bunu mətbuata açıqlamasında millət vəkili Zahid Oruc bildirib. Onun sözlərinə görə, hazırda rayonun Bəciravan, Nazırlı, Tumaslı və Yerli Ağalı kəndləri də tam qazlaşdırılıb:

“Prezidentin qərarı ilə Qarabağın, xüsusilə Bərdənin qazlaşdırılması prosesi başa çatmaq üzrədir. Artıq dörd kənd üzrə 1070-dən artıq ailə qazla təmin olunub. Heç şübhəsiz ki, bu addım dövlətin müvafiq qurumları vasitəsilə həyata keçirilib. “Azəriqaz” rəhbərliyi, sədr Əkbər Hacıyev, o cümlədən, departament direktoru Ramil İskəndərov və digərləri bilavasitə bu işlərin yerinə yetirilməsində iştirak ediblər. Bununla paralel rayonun enerji və su təminatı ilə bağlı məsələlər də 2016-cı ildə başa çatacaq. Çünki ötən illər ərzində bu istiqamətdə də xeyli işlər görülüb. Bir sözlə, hesab edirəm ki, infrastruktur təminatı bölgələrin həyatı üçün çox önəmlidir və vətəndaşların Bakıya və digər məkanlara axınının qarşısının alınması, regionda yerli ənənələrin davamlılığı, dövlətin müəyyən mənada deqradasiya - başqa xarakterli yükdən azad olunması baxımından bu addımlar çöx önəmlidir”.