Bu gün Azərbaycanın ilk iki şəhidindən biri – Bəxtiyar Quliyevin doğum günüdür. Bu münasibətlə onun Ağdamın Şıxbabalı kəndindəki qəbri ziyarət edilib. 

Bu barədə Qaziler.az saytına "Qarabağ qaziləri" ictimai birliyinin mətbuat rəhbəri Rey Kərimoğlu məlumat verib. 

Bəxtiyar Quliyev 1988-ci ildə Ağdamdan Əsgərana təşkil olunan dinc yürüş zamanı ermənilər tərəfindən açılan atəş nəticəsində Əli Hacıyevlə birlikdə şəhid olub.

Bəxtiyar Quliyevin məzarı doğulduğu Ağdam rayonunun işğaldan azad edilmiş Şıxbabalı kənd qəbiristanlığındadır. Ötən il həmin qəbiristanlıqda onun baş və sinə daşı tapılıb.

Bu gün şəhidin ailə üzvləri və yaxınları, həmçinin Ağdam Rayon İcra Hakimiyyətinin nümayəndələri Bəxtiyar Quliyevin Şıxbabalı kəndindəki məzarını ziyarət edib. 

Rey Kərimoğlu xatırladıb ki, Bəxtiyar Quliyev və Əli Hacıyev 1988-ci ildə baş verən fevral hadisələri zamanı Azərbaycanın ilk şəhidlərindəndir. Ağdam işğal olunduğuna görə, Əli Hacıyevin məzarı Ağdam rayonunun Qarağacı qəbiristanlığında, Bəxtiyar Quliyevin məzarı isə Ağdamın Şıxbabalı kəndində idi. Ağdam işğaldan azad olunduqdan sonra ərazi kənd qəbiristanlığı dağıdıldığına görə uzun müddət Azərbaycanın ilk şəhidlərinin məzarları axtarılıb. Nəhayət, 2024-cü ildə Bəxtiyar Quliyevin qəbri tapılıb. 

QAZİLER.AZ