Azərbaycana bahar martın 21-i Bakı vaxtı ilə saat 02:45-də qədəm qoyacaq

Bu gün Novruzun ilk çərşənbəsi - su çərşənbəsidir. QAZİLƏR saytı bildirir ki, Bahar bayramı olan Novruz ölkəmizə məhz su çərşənbəsi ilə qədəm basır. Su çərşənbəsi suyun təzələnməsi kimi anlaşıldığından həmin gün bütün mərasimlər su ilə bağlı olur. İnsanlar həmin gün sübh tezdən axar suyun üstünə gedir, üstündən atılır. Bulaqlardan, çaylardan yeni su gətirilib evlərə, mənzillərə səpilir. Həmin sudan içilir ki, göhnə ildə olan azar-bezar elə köhnə ildə də qalsın. Su Çərşənbəsində süfrədə təmiz sudan hazırlanmış pürrəngi çayın olması mütləqdir. Azərbaycanın bəzi yerlərində bu gün bayram kimi qeyd olunur, şirniyyatlar bişirilir, süfrə bəzənir.
Qeyd edək ki, bu il Azərbaycan ərazisində baharın gəlişi martın 21-i Bakı vaxtı ilə saat 02:45-də baş verəcək. Novruzun axır çərşənbəsi martın 17-nə təsadüf edəcək.