Azərbaycan Respublikasının Prezidenti yanında Gənclər Fondunun maliyyə yardımı ilə keçirilən “Zəfərin Əsgərləri: 44 Günün Qəhrəmanlar” layihəsi Bakıda yerləşən 54 saylı məktəbdə yekun tədbiri keçirilib.
Layihə rəhbəri "Dünyəviliyin və Maarifpərvərliyin" Təbliğinə Dəstək İctimai Birliyinin rəhbəri Günel Mürsəlli layihə ilə bağlı tədbir iştirakrçılarına məlumat verib. Onun sözlərinə görə, layihə Azərbaycan ordusunun 44 günlük müharibənin qəhrəmanları ilə bağlı  orta məktəb şagirdləri arasında necə təbliğ olunduğunu öyrənmək və onlara bu barədə məlumat vermək məqsədi ilə həyata keçirilib. Qeyd edilib ki, Gənclər Fondu tərəfindən maliyyələşdirilən layihə Abdulla Şaiq adına 54 nömrəli tam orta məktəblə birlikdə həyata keçirilib.
Daha sonra məktəbin direktoru Sahibə Abbasova çıxışı zamanı qeyd edib ki,  44 günlük müharibənin qəhrəmanlarının  təbliği ilə bağlı məktəbdə mütəmadi olaraq tədbirlər keçirilir, dərs prosesində də şagirdlərə vətənpərvərlik mövzusunda məlumat verildiyini diqqətə çatdırıb.
Tədbirə qonaq qismində dəvət olunan “Gələcəyə Baxış” Avropaya İnteqrasiya İctimai Birliyinin sədri Bəsti Nəsibova çıxış edib. O bildirib ki, bu cür tədbirlərin keçirilməsi ilə vətənpərvərliyin təbliği işinə töhfə verilir. Evdə valideynlər, məktəbdə müəllimlər şagirdlərə vətənpərvərlik hisslərini aşılamalıdır. 44 günlük müharibədə qələbəmizlə biz Azərbaycanın nəyə qadir olduğunu bütün dünyaya nümayiş etdirdik”, – QHT sədri əlavə edib.
Çıxışlar zamanı bildirilib ki, bundan öncə tədbir Tərtər şəhərində keçirilib və orada döyüşlər zamanı şəhid olan Nicat İsgəndərovun atası ilə görüş olub.
Tədbirin yekununda məktəb şagirdlərinin ifasında vətənpərvərlik mövzusuna həsr edilmiş şeir və mahnılar səsləndirilib. Dövlət bayraqlarını daşıyan hərbi geyimli şagirdlər qadir olduqları vətənpərvərlik ruhunu nümayiş etdirir.