Bu gün müdafiə naziri general-polkovnik Zakir Həsənov Koreya Respublikasının Munqyeonq şəhərində keçirilən Beynəlxalq Hərbi İdman Şurasının (CİSM) hərbçilərin VI Dünya Oyunlarında medal qazanan idmançılar və onların məşqçiləri ilə görüşüb.

QAZILER.AZ-ın Müdafiə Nazirliyinin saytına istinadən verdiyi məlumata görə, nazir qazanılmış böyük və inamlı qələbə münasibətilə idmançıları, məşqçiləri və mütəxəssisləri təbrik edib. Hərbi idmançılarımızın bu uğurunu yüksək qiymətləndirən nazir Azərbaycanın dünyanın aparıcı idman ölkələri sırasında olduğunu vurğulayıb.

Qələbədə əməyi olan idmançı, məşqçi və mütəxəssisləri təbrik edən müdafiə naziri bundan sonra da Silahlı Qüvvələrdə idmana daha çox diqqət ayrılacağı, yeni tikilən hərbi şəhərciklərdə idman komplekslərinin inşa ediləcəyini də diqqətə çatdırıb.
Gələcəkdə keçiriləcək beynəlxalq yarışlarda ölkəmizi layiqincə təmsil etməyi idmançılara arzu edən Müdafiə naziri qələbədə zəhməti keçənlərə təşəkkür edərək onlara qiymətli hədiyyələr təqdim edib. Sonda xatirə fotosu çəkilib.



Xatırladaq ki, yarışlarda Azərbaycanı Mərkəzi Ordu İdman Klubunun sərbəst və yunan-Roma güləşi, cüdo və taekvando idman növləri üzrə komandaları təmsil ediblər. Ümumiyyətlə 120 ölkədən 8100 idmançının iştirak etdiyi hərbçilərin VI Dünya Oyunlarında Azərbaycan təmsilçiləri 12 medal qazanaraq (2 qızıl, 4 gümüş və 6 bürünc) ümumi hesabda komandamız 15-ci yeri tutub.