Serbiyanın paytaxtı Belqrad şəhərində 10-11 oktyabr tarixlərində Avropa qitəsinə daxil olan ölkələrdə fəaliyyət göstərən jurnalist təşkilatlarının ümumi toplantısı keçirilib.

JuHi-nin mətbuat xidmətindən Lent.az-a verilən məlumata görə, keçirilən toplantıya Avropanın 40 ölkəsindən 45 jurnalist təşkilatı qatılıb. Avropa Jurnalistlər Federasiyasının təşkilatçılığı ilə keçirilən toplantıda Azərbaycandan Jurnalistlərin Həmkarlar İttifaqı (JuHİ) iştirak edib.
JuHİ sədri Müşfiq Ələsgərli bildirib ki, Avropanın nüfuzlu media təşkilatları təmsilçilərinin qatıldığı tədbirdə əsas müzakirə mövzusu “Medianın inkişafında jurnalist təşkilatlarının rolu” və “Şərqi Avropada jurnalist təşkilatlarının durumu” olub. Bununla yanaşı, aktuallığı nəzərə alınaraq, “Balkan ölkələrində medianın özəlləşdirilməsi prosesi: problemlər və perespektivlər” mövzusu xüsusi hal kimi müzakirəyə çıxarılıb: “Balkan ölkələrində yeni media qanunvericiliyinə uyğun olaraq, medianın yenidən özəlləşdirilməsi proqramı həyata keçirilir. Burada həm dövlət nəzarətində olan KİV-lər özəlləşdirilir, həm də, özəl media təşkilatlarının statuslarının yeni qanunvericiliyə uyğunlaşdırılması tələbi var. Prosesin gedişində media professionallarını narahat edən məqamlar yaranıb. Beləki, Proqram yüzlərlə jurnalistin iş yerini itirməsi ilə müşaiyət olunur ki, bu zaman iş yerini itirən jurnalistlərin hüquqlarının qorunması mexanizminin hazırlanmamağı ciddi problemlər yaradır. Əlavə olaraq, özəlləşdirilən KİV-lərin əksəriyyəti maliyyə qaynaqları şəffaf olmayan qrupların əlinə keçir ki, bu da bölgədə müstəqil media qurumlarının sayının kəskin azalması deməkdir. Avropanın jurnalist təşkilatları bu tendensiyanın genişlənəcəyindən, qısa müddətdə bütün Avropa üçün xarakterik hala çevriləcəyindən narahatdırlar”.
Avropalı ekspertlər qeyd ediblər ki, onsuz da, son illər qitədə media sahibkarlığı məsələsində qeyri şəffaflığın artması, nüfuzlu media qurumlarının qeyri-rəsmi güclərin təsir dairəsinə düşməsi və onların maraqlarının təmsilçisinə çevrilməsi halları genişlənir. JuHİ sədri bildirib ki, konfrans iştirakçıları neqativ tendensiyaların qarşısının alınması üçün, jurnalist təşkilatlarının inkişaf etdirilməsinin, media qurumları arasında həmrəyliyin artırılmasının, əlaqələrin gücləndirilməsinin zəruri olduğu fikrini bölüşüblər.