Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi və Dövlət Yanğın Nəzarəti Xidməti tərəfindən paytaxtın Binə və Buzovna qəsəbələrində yerləşən qanunsuz tikililərin söküntüsü zamanı qalmaqal yaşanıb.

Sakinlər FHN əməkdaşlarının onlardan evlərini sökməmək üçün 10 min manat pul tələb etdiyini iddia ediblər.

Sakinlər tikililərə aid müəyyən sənədlərin olduğu halda evlərinin sökülməsinə etiraz ediblər.

Daha ətraflı Baku TV-nin süjetində:

 

13:12

Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi və Dövlət Yanğın Nəzarəti Xidməti tərəfindən respublika ərazisində qanunsuz tikintilərlə bağlı birgə tədbirlərin həyata keçirilməsi davam etdirilir.

APA xəbər verir ki, Bakı şəhərinin Xəzər rayonu ərazisində müvafiq icazəverici sənədlər olmadan, o cümlədən yanğın təhlükəsizliyinə dair normativ sənədlərin tələbləri pozulmaqla tikinti işlərinin aparılması faktları aşkar edilib.

FHN-in Dövlət Yanğın Nəzarəti Xidməti və Tikintidə Təhlükəsizliyə Nəzarət Dövlət Agentliyi tərəfindən həyata keçirilən müvafiq tədbirlər nəticəsində qanunsuz tikinti işlərinin qarşısı alınıb və obyektlər sökülüb.

Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyinin müfəttişi Adil Bayramov açıqlamasında bildirib ki, dəfələrlə xəbərdarlıq edilməsinə rəğmən sökülən obyekt sahibləri heç bir sənəd təqdim etməyiblər:

“Xəzər rayonu Buzovna qəsəbəsində Nizami küçəsində dəfələrlə xəbərdarlıq edilməsinə rəğmən qanunsuz tikintiyə davam etdirilib. Tərəfimizdən qanunsuz tikilən obyektlərə qarşı söküntü edilməsi qərarı verilib. Bundan başqa Qala qəsəbəsi Südçülük sovxozu ərazisində də iki dənə qanunsuz obyektin söküntüsü aparılacaq”.

Qeyd edək ki, Fövqəladə Hallar Nazirliyi qanunsuz ev və obyektlərin tikintisinə qarşı tədbirləri davam etdirilir.