Ümummilli Lider Heydər Əliyevin anadan olmasının 100 illiyi ilə əlaqədar Əmək və Əhalinin Sosial Müdafiəsi Nazirliyi tərəfindən Ekologiya və Təbii Sərvətlər Nazirliyi ilə birgə Bakının Müşfiqabad qəsəbəsində ağacəkmə aksiyası keçirilib.

Qaziler.az xəbər verir ki, aksiyada əmək və əhalinin sosial müdafiəsi naziri Sahil Babayev, ekologiya və təbii sərvətlər naziri Muxtar Babayev, Milli Məclisin Təbii ehtiyatlar, energetika və ekologiya  komitəsinin sədri Sadiq Qurbanov, Əmək və Əhalinin Sosial Müdafiəsi Nazirliyindən 100 əməkdaş və 50-dək DOST könüllüsü, habelə ekokönüllülər iştirak ediblər.

Ərazidə Abşeron yarımadasının torpaq-iqlim şəraitinə uyğun 500 Eldar şamı və zeytun ağacı əkilib. 

Ağacəkmə tədbirlərinin keçirilməsində məqsəd yaşıllıqların artırılmasına, ətraf mühitin sağlamlaşdırılmasına hər zaman böyük önəm vermiş Ulu Öndər Heydər Əliyevin əziz xatirəsini yad etmək, Ümummilli Liderin təbiətə, yaşıllıqlara  qayğı ənənələrini davam etdirməkdir.