4 aprel - Beynəlxalq Mina Xəbərdarlığı və Mina Fəaliyyətinə Yardım Günü çərçivəsində aprelin 3-də ANAMA və AFFA arasında əməkdaşlıq memorandumunun imzalanması mərasimi olub.
Qaziler.az bildirir ki, Azərbaycan Respublikasının Minatəmizləmə Agentliyi işğaldan azad olunmuş və müharibənin təsirinə məruz qalmış ərazilərdə minatəmizləmə fəaliyyətinin icrası ilə paralel olaraq Partlayıcı Sursatların Təhlükəsinə dair Maarifləndirmə və minadan zərərçəkənlərə qayğı göstərilməsi, onların daima mənəvi ruh yüksəkliyinin təmin olunması istiqamətində aparılan işlərə də böyük əhəmiyyət verir.
Belə ki, qeyd olunan istiqamətdə fəaliyyətin genişləndirilməsi və inkişaf etdirilməsi məqsədilə Azərbaycan Respublikasının Minatəmizləmə Agentliyi (ANAMA) Azərbaycan Futbol Federasiyaları Assosiasiyası (AFFA) ilə səylərini birləşdirir.
Bu gün Bakı Olimpiya Stadionunda Azərbaycan Futbol Federasiyaları Assosiasiyası (AFFA) və Azərbaycan Respublikasının Minatəmizləmə Agentliyi (ANAMA) arasında Anlaşma Memorandumunun imzalanması ilə bağlı tədbir keçirilib.
Memorandum qarşıya qoyulan prioritet məqsədlərin həyata keçirilməsində tərəflərin əməkdaşlığını təmin etmək, mina təhlükəsinə dair maarifləndirmə sahəsində kütləviliyin artırılması üçün birgə tədbirlər həyata keçirmək, minadan zərərçəkmiş şəxslərin sosial inteqrasiyası üçün onların müxtəlif futbol yarışlarında, digər kütləvi idman tədbirlərində iştirakını dəstəkləmək kimi vacib məsələləri özündə ehtiva edir.
Anlaşma Memorandumunu AFFA-nın baş katibi Sərxan Hacıyev və Minatəmizləmə Agentliyinin İdarə Heyətinin sədri Vüqar Süleymanov imzalayıb.
İmzalanma mərasimində çıxış edən AFFA-nın baş katibi Sərxan Hacıyev qeyd edib ki, “AFFA ilə ANAMA arasında Anlaşma Memorandumunun imzalanması xüsusi əhəmiyyət kəsb edən məsələdir. Təəssüf ki, Azərbaycan dünyada mina təhlükəsindən çox ciddi əziyyət çəkən ölkələrdən biridir. Bu səbəbdən, mina partlayışı nəticəsində vətəndaşlarımızın həlak olması və ya ağır yaralanması halları ilə qarşılaşırıq. Düşünürəm ki, AFFA və ANAMA arasında əsasını qoyduğumuz tərəfdaşlıq mina partlayışları nəticəsində xəsarət almış şəxslərin futbol oyunlarının və turnirlərinin təşkili, sevimli idman növündən zövq almalarına zəmin yaradılması üzərimizə düşən məsuliyyətlərdən biridir”.
Memorandumda qeyd olunur ki, birgə əməkdaşlıq çərçivəsində tərəflər oyunlar və turnirlər təşkil edəcək, eləcə də turnirlərdə mina təhlükəsinə dair maarifləndirici çağırışların geniş şəkildə yayılması və ictimaiyyətə çatdırılması istiqamətində lazımi dəstək verəcək. Habelə, mina təhlükəsinə dair maarifləndirmə və inklüziv futbol turnirlərini (mina partlayışları nəticəsində xəsarət almış şəxslərin futbol oyunları və turnirləri) dəstəklənməsi məqsədilə əməkdaşlıq mexanizmlərinin yaradılması istiqamətində müvafiq tədbirlər görüləcək.
Daha sonra çıxış edən Azərbaycan Respublikası Minatəmizləmə Agentliyinin İdarə Heyətinin sədri Vüqar Süleymanov bildirib ki, “Ölkəmizin genişmiqyaslı mina problemi ilə üzləşdiyi bir zamanda ANAMA və AFFA arasında imzalanan Anlaşma Memorandumu istər Partlayıcı Sursatların Təhlükəsinə dair Maarifləndirmə, istərsə də mina və partlamamış hərbi sursatlardan zərərçəkən şəxslərin cəmiyyətə reinteqrasiyası baxımından böyük əhəmiyyətə malikdir. Günümüzdə böyük bir kütlə tərəfindən sevilən və izlənən futbol idman növü üzrə inklüzivliyin dəstəklənməsi, mina hadisələri nəticəsində müxtəlif xəsarətlər alan və ya amputant futbolçuların bu idman növünə cəlb olunması və sosial-ictimai rifahının yaxşılaşdırılması olduqca vacib məsələlərdən biridir”.
Anlaşma Memorandumu imzalandıqdan sonra Bakı Olimpiya Stadionunun ərazisində yerləşən meydançada mina partlayışları nəticəsində xəsarət almış amputant şəxslər arasında futbol oyunu keçirilib.
Tədbirdə iştirak edən jurnalist Rey Kərimoğlu Qaziler.az-a bildirib ki, 4 aprel - Beynəlxalq Mina Xəbərdarlığı və Mina Fəaliyyətinə Yardım Günü ilə bağlı Azərbaycanda bir çox tədbirlər keçirilir. "Minadan Zərərçəkənlər Asossasiyasının rəhbəri olaraq mən də bu tədbirlərdə iştirak edirəm. İndi Olimpiya İdman Mərkəzində AFFA və ANAMA arasında memorandum imzalandı.yəni mina qurbanlarının idmana cəlb edilməsi, onların cəmiyyətə inteqrasiyası üçün çox vacib memorandumdur. 1990-cı ildən bəri Azərbaycanda 3361 nəfər minaya düşən insan var. Onların əli, qolu amputasiya olunub. Bu gün burada həmin adamlar arasında futbol yarışı keçirilir. Biz bu addımları yüksək qiymətləndiririk. Azərbaycan dövləti mina qurbanlarının problemlərinin həlli, minaların təmizlənməsi məsələsinə çox böyük diqqət göstərir, bu yöndə çox böyük işlər görür", - deyə R.Kərimoğlu qeyd edib. .
QAZİLER.AZ
