Bu gün Qarabağ qazisi, "Azərbaycan Bayrağı" ordeni ilə təltif edilmiş, "Əməkdar jurnalist", Qarabağ Müharibəsi Əlilləri, Veteranları və Şəhid Ailələri İctimai Birliyi Ağdam Rayon Şöbəsinin sədri Baxşeyiş Abbas oğlu Hətəmlinin doğum günüdür. Xalqımızın qəhrəman oğlunun 60 illik yubileyidir. 

B.Hətəmli 1963-cü ilin fevral ayının 15-də Ağdam rayonunun Əliağalı kəndində doğulub. 1970-80-ci illərdə Ağdam rayonunun Əliağalı kənd orta məktəbində oxuyub. 1981-82-ci illərdə, 1984-1987-ci illərdə Ağdam rayonunun M.F. Axundov adına sovxozunda fəhlə işləyib, 1982-1984-cü illərdə keçmiş sovet ordusu sıralarında xidmət edib.

1981-90-cı illərdə istehsalatdan ayrılmadan Bakı Dövlət Universitetinin jurnalistika fakultəsində oxuyub, jurnalist ixtisası alıb. 1987-ci ilin sentyabr ayından isə "Ağdam" qəzetində müxbir kimi fəaliyyətə başlayıb. O, 1991-ci ilin noyabr ayının 1-dən 1996-cı ilin yanvar ayının 23-dək Azərbaycan Milli Ordusunun 836 və 708 saylı hərbi hissələrinin tərkibində bölmə, taqım, bölük komandiri, qərargah rəisi, əlahiddə kəşfiyyat bölük komandiri və kəşfiyyat rəisi vəzifələrində xidmət edib. Ehtiyatda olan baş leytenant, II qrup Qarabağ müharibəsi əlilidir. Qarabağ Müharibəsi Əlilləri, Veteranları və Şəhid Ailələri İctimai Birliyi Ağdam Rayon Şöbəsinin sədridir. 1998-ci ildən "Ağdam" qəzetinin, 2004-cü ildən həm də "Qeyrət qalası" qəzetinin redaktorudur.
Baxşeyiş Hətəmli 1995-ci ildə "Azərbaycan Bayrağı" ordeni ilə təltif edilmiş, iki dəfə 708 saylı hərbi hissənin döş nişanını almış və 2010-cu ildə isə "Əməkdar jurnalist" fəxri adına layiq görülüb.

1998-ci ildən "Ağdam" qəzetinin, 2004-cü ildən həm də "Qeyrət qalası" qəzetinin redaktorudur.

B.Hətəmlini 60 illik yubileyi münasibəti ilə təbrik edirik! Ona uzun ömür və can sağlığı arzulayırıq!