Professor Nasir Əhmədli dəfn olunub - FOTO

 Professor Nasir Əhmədli dəfn olunub - FOTO backend

Azərbaycanın Əməkdar jurnalisti Nasir Əhmədli Tovuz rayon Alakol kənd qəbiristanlığında dəfn edilib.

"Report"un Qərb bürosunun məlumatına görə, dəfn mərasimində onun yaxınları, ziyalılar, rəsmi şəxslər və həmkəndliləri iştirak ediblər.

Qeyd edək ki, Nəsir Əhmədli 1942-ci ildə Tovuz rayonunun Alakol kəndində anadan olub. 1959-cu ildə həmin kənddə orta məktəbi bitirib. 1962–1965-ci illərdə hərbi xidmətdə olub. 1971-ci ildə BDU-nun Jurnalistika fakültəsini bitirib. 1981-ci ildə “Sovet gerçəkliyi və xarici publisistikada onun inikası (Sovet Azərbaycanı haqqında 1966–1975-ci illərdə dərc olunmuş materiallar əsasında)” mövzusunda namizədlik dissertasiyası müdafiə edib. 2007-ci ildə “Azərbaycan Beynəlxalq Radiosunun Yaxın və Orta Şərq ölkələrinə yayımı: tarix, təcrübə, nəzəriyyə” mövzusunda doktorluq dissertasiyası müdafiə edib.

Müxtəlif illərdə V.Sturua adına Bakı Gəmi Təmiri Zavodunda, Azərbaycan Dövlət Televiziyasında çalışıb. 2004-cü ildən "Beynəlxalq jurnalistika" kafedrasında çalışırdı. “Jurnalistin nitq mədəniyyəti”, “Azərbaycan Beynəlxalq Radiosu: tarix və ənənə”, “Xüsusi kurs”, “KİV xaricə siyasi informasiya yayımı sistemində” fənlərini tədris edib. 100-dən artıq elmi məqalənin, 3 monoqrafiyanın, 1 dərsliyin, 5 dərs vəsaitinin, bütövlükdə 15 kitabın müəllifidir. On elmlər namizədinə rəhbərlik edib, 1 elmlər doktorunun, 11 elmlər namizədinin rəsmi opponenti olub. Beynəlxalq radio yayımının jurnalistikanın bütün sahələrinə tətbiq edilə biləcək model-sxemini hazırlayıb, bu sahədə fəaliyyət göstərən 6 qanun aşkarlayıb.

Moskvada, Bakıda, Almatıda, Tbilisidə, Ufada, Sankt-Peterburqda, Lüblində konfranslarda iştirak edib. Məruzələri nüfuzlu elmi jurnallarda dərc olunub.

Azərbaycan Yazıçılar və Jurnalistlər Birliyinin, Azərbaycan Mətbuat Şurası İdarə Heyətinin üzvü olub.

12:00

Azərbaycanın Əməkdar jurnalisti, Bakı Dövlət Universitetinin (BDU) Beynəlxalq jurnalistika kafedrasının professoru, filologiya elmləri doktoru Nəsir Əhmədli ilə vida mərasimi keçirilir.

"Report"un Qərb bürosunun məlumatına görə, əməkdar jurnalistin doğulduğu Tovuz rayon Alakol kəndində keçirilən vida mərasimində onun yaxınları ilə yanaşı, ictimaiyyət və media nümayəndələri, ziyalılar da iştirak edirlər.

Vida mərasimi başa çatdıqdan sonra mərhum Alakol kənd qəbiristanlığında dəfn olunacaq.

Qeyd edək ki, Azərbaycan Yazıçılar və Jurnalistlər Birliyinin , Azərbaycan Mətbuat Şurası İdarə heyətinin üzvü olan N.Əhmədli 80 yaşında dünyasını dəyişib. O, ağciyər xərçəngindən əziyyət çəkirdi.

loading...
Diaspora