Fövqəladə Hallar Nazirliyinin Mülki Müdafiə Qoşunlarının mülki müdafiə idarəsi Şamaxıda kompleks təlimlərə hazırlıqla bağlı “Fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda müşavirə keçirib.
AZƏRTAC xəbər verir ki, müşavirədə Şamaxı Rayon İcra Hakimiyyəti başçısının birinci müavini, rayon Fövqəladə Hallar Komissiyasının sədri Qasım Qasımov çıxış edərək təlimin keçirilməsinin məqsədlərindən danışıb. Vurğulayıb ki, əsas məqsəd fövqəladə hallardan mühafizə və mülki müdafiə sahəsində normativ sənədlərin tələblərinə əməl olunmasının və mülki müdafiə idarəetmə orqanlarının, fövqəladə hallar üzrə komissiyaların fövqəladə hadisələr zamanı qarşıda duran vəzifələrin yerinə yetirilməsinə hazırlığının yoxlanılması, fövqəladə hallar zamanı əhalinin və işçilərin mühafizəsinin təşkili, mülki müdafiə idarəetmə orqanlarına, qüvvələrinə, fövqəladə hallar üzrə komissiyalara, rəhbər heyət və işçilərə fövqəladə hadisələrin nəticələri aradan qaldırılarkən xilasetmə və digər təxirəsalınmaz işlərin təşkili və yerinə yetirilməsi üzrə praktiki vərdişlərin aşılanmasıdır. Təlimə rayon icra hakimiyyəti, rayon fövqəladə hallar komissiyası, mülki müdafiə xidmətləri, ərazi və obyekt mülki müdafiə qüvvə və vasitələri cəlb ediləcək.
Sonra FHN-in Sumqayıt Regional Fövqəladə Hallar və Mülki Müdafiə Şöbəsinin rəisi, polkovnik Altay Şikarov çıxış edərək təlim zamanı rayonun mülki müdafiə qüvvələri tərəfindən şərti olaraq fövqəladə hal baş vermiş ərazinin mühafizəsi, əraziyə giriş-çıxışın məhdudlaşdırılması, yanğının söndürülməsi, kimyəvi zəhərlənmə zonasının lokallaşdırılması, partlayış baş verən obyektdə kimyəvi kəşfiyyatın təşkili, axtarış-xilasetmə, zərərçəkənlərə ilk tibbi yardımın göstərilməsi, epidemiya və epizootiyaya qarşı mühafizə tədbirləri və adamların təhlükəsiz ərazilərə təxliyəsi ilə bağlı tapşırıqların yerinə yetiriləcəyi barədə məlumat verib.
Həmçinin diqqətə çatdırılıb ki, təlimdə əsas diqqət komandir-rəis heyətinin idarəetmə bacarıqlarının və mülki müdafiə dəstələrinin şəxsi heyətinin peşəkarlıq səviyyəsinin artırılmasına, xilasetmə və digər təxirəsalınmaz işlərin aparılması zamanı təhlükəsizlik qaydalarına ciddi əməl olunmasına yönəldiləcək.
Daha sonra çıxış edən FHN-in Şamaxı Regional Fövqəladə Hallar və Mülki Müdafiə Şöbəsinin rəisi, polkovnik-leytenant Faiq Əhədov bildirib ki, kompleks təlimlərə rayonun hərbiləşdirilməmiş dəstələrinin 230 nəfər şəxsi heyəti və 38 ədəd texnika cəlb olunacaq.
