Mələk İsazadə adlı qadına göndərilən bağlamadan 100 ədəd psixotrop dərman çıxıb. Niderlanddan bakıya həb sifariş verən qadın saxlanılıb. Bakı Baş Gömrük İdarəsinin Poçt Göndərişlərinə Nəzarət Bölməsində Niderland Krallığından beynəlxalq poçt göndərişləri vasitəsi ilə Mələk İsazadənin adına daxil olan poçt bağlamasında həmin bağlamada 100 ədəd həb aşkar edilib.

ANS PRESS-in Dövlət Gömrük Komitəsinin mətbuat xidmətinə istinadən verdiyi məlumata görə, həblər gömrük baxışı keçirilərkən tapılıb.

Məlumatda bildirilir ki, ananas meyvəsi formasında olan plastik fiqurun içərisində gizlədilən bu həblərdən 50 ədədi çəhrayı və 50 ədədi mavi rəngli olub.

Ədliyyə Nazirliyi Məhkəmə Ekspertizası Mərkəzinin ekspert arayışına əsasən tədqiqata təqdim edilmiş 100 ədəd həb psixotrop maddə - metilendioksiamfetamindir (MDA və ya tenamfetamin). 100 ədəd həbdə MDA-nın təsir maddəsinin ümumi miqdarı 20 qram təşkil edir və bu maddə Azərbaycan Respublikasının ərazisində dövriyyəsi qadağan edilən psixotrop maddələrin siyahısına daxildir.

Əməliyyat-axtarış tədbirləri nəticəsində qeyd olunan bağlamanı sifariş verən Azərbaycan vətəndaşı Mələk İsazadə müəyyən edilib və o, poçt göndərişini qəbul edən zaman saxlanılıb.