Nobel prospektində 3 nəfərin yaralanması ilə nəticələnən qəza baş verib. APA TV-nin məlumatına görə, qəza zamanı "İsuzu" markalı “90 RB 233” dövlət nömrə nişanlı 57 saylı marşrut avtobusu və “10 LK 639” nömrəli "Wolksvagen Passat"markalı avtomobil toqquşub. Qəzada "Passat"ın sürücüsü 22 yaşlı Kənan Ağayev ağır, sərnişinləri - 23 yaşlı Bayram Məmmədov və 23 yaşlı Leyla Məmmədova yüngül yaralanıblar. Yaralılar əraziyə çağırılan təcili tibbi yardım maşını ilə 3 saylı şəhər xəstəxanasına çatdırılıb. Xoşbəxtlikdən avtobusda sərnişin olmayıb. Hadisə yerinə Dövlət Yol Polisinin Xətai Rayon Şöbəsinin əməkdaşları gəliblər.

Qəza Nobel prospekti ilə Süleyman Əhmədov küçəsinin kəsişməsinə baş verib. İlkin ehtimala görə, hadisəyə sürücülərdən birinin işıqforun qırmızı işığında hərəkət edərək digərinin yoluna çıxması səbəb olub. Hadisənin səbəbi təhlükəsiz şəhər kamerası vasitəsi ilə müəyyən olunacaq. Qəza yerinə evakuator çağırıldıqdan sonra hər iki maşın cərimə meydançasına aparılıb. Faktla bağlı Xətai Rayon Polis İdarəsində araşdırma aparılır.