Sumqayıt Şəhər İcra Hakimiyyətinin təşəbbüsü, Gənclər və İdman Baş İdarəsinin təşkilatçılığı ilə iyul ayının əvvəlindən başlayan Sumqayıt gənclərinin “Yay məktəbi” davam etməkdədir. “Yay məktəbi” layihəsi çərçivəsində gənclərin növbəti qrupu Şamaxı şəhərində olub.
AZƏRTAC xəbər verir ki, Şamaxıda ulu öndər Heydər Əliyevin abidəsini ziyarət edən gənclər sonra Heydər Əliyev Mərkəzi və bir sıra muzeylərlə tanış olublar.
“Yay məktəbi”ndə ayrı-ayrı sahələri təmsil edən yaradıcı, istedadlı və ictimai fəal gənclərə Şamaxının tarixi və mədəniyyəti ilə bağlı ətraflı məlumat verilib, asudə vaxtları səmərəli təşkil edilib.
Qeyd edək ki, ümumilikdə 500 nəfərdən artıq gəncin iştirak edəcəyi “Yay məktəbi” vətənpərvərlik hisslərinin aşılanması, gənclərin ölkəmizin ayrı-ayrı bölgələrini tanımaları və asudə vaxtlarının səmərəli keçirilməsi məqsədi daşıyır.
