Gənclər üçün Təhsil Mərkəzinin Quba regional ofisi şimal regionunda “Biznes planlama xidməti”nin ilk təlimlərinə başlayıb.

Mərkəzdən AZƏRTAC-a bildiriblər ki, “Biznes planlama xidməti”nin təlim kursları çərçivəsində gənclərə şəxsi inkişaf, biznesin idarəetməsi, marketinq, əməyin mühafizəsi və s. mövzular tədris olunacaq.

İlk təlimin mövzusu “Marketinq və onun həyata keçirilməsinin innovativ metodikası” olub, nəzəri biliklərin gənclər tərəfindən daha yaxşı qavranılması üçün “tətbiq edərək öyrənmək” texnikalarından istifadə edilib. Qrup məşğələləri formatında davam edən təlim Ankara Universitetinin məzunu, “Sportsman” jurnalının marketinq meneceri Nuray Acalova tərəfindən keçirilib.

Növbəti təlimlərin regionun aparıcı sahibkarları və peşəkar ekspertləri tərəfindən keçirilməsi nəzərdə tutulub.

Qeyd edək ki, gənclərin məşğulluq imkanlarının artırılmasına hesablanmış bu təlimlərin sonunda iştirakçıların məlumat bazası yaradılacaq və onlar üçün əmək yarmarkaları təşkil ediləcək.