II Qarabağ müharibəsində cəbhə xəttində döyüşərək Ermənistan ordusunun müdafiə xəttini yarıb mövqelərini ələ keçirən Azərbaycan xüsusi təyinatlılarının qələbədə mühüm rolu olub. “Vətən müharibəsi” adlandırılan bu döyüşdə iştirak edən əsgərlər bu gün ölkə daxilində vətəndaşların böyük ehtiramı ilə qarşılanır. Xalq 30 illik işğal və vətən həsrətini sona çatdıran hər bir veteranı qəhrəman kimi görür.
Modern.az xəbər verir ki, bu qəhrəmanlardan biri, xüsusi təyinatlı qazi Bəhram Əhmədov müharibə dövrünü xatırlayıb.
O mindiyi avtomobilin tank əleyhinə minaya düşməsi nəticəsində dostunun şəhid olması və özünün ağır yaralanması ilə döyüş meydanını tərk etmək məcburiyyətində qalıb. Buna baxmayaraq, qələbədə payı olmasından qürur duyduğunu deyib.
Müharibənin 4-cü ildönümündə Anadolu Agentliyinə danışan Əhmədov 2003-cü ildən xüsusi təyinatlı dəstələrdə xidmət etdiyini, döyüşə hər zaman hazır olmaq üçün təlimlər keçdiklərini bildirib. Prezident İlham Əliyevin torpaqların işğaldan azad edilməsi ilə bağlı sərəncamını alqışladığını qeyd edən Əhmədov müharibənin ilk günlərində Kəlbəcərin strateji mövqelərini azad etdiklərini vurğulayıb. Daha sonra isə Füzuli, Cəbrayıl və Hadrut rayonlarının azad olunması üçün döyüşüb.
O, Hadrut döyüşləri zamanı tank əleyhinə mina ilə toqquşduğunu və dostlarının yanında qala bilmədiyi üçün xəyal qırıqlığı yaşadığını bildirib. Bir müddət sonra özünü xəstəxanada tapdığını deyən Əhmədov, yaralı olduğunu qəbul etməkdə çətinlik çəkdiyini və döyüş meydanına qayıtmaq istədiyini, lakin həkimlərin buna icazə vermədiyini əlavə edib.
Qazi Bəhram Əhmədov müharibədən əvvəl xüsusi təyinatlılar məktəbində təlimatçı olaraq təyin edildiyini və öyrətdiyi əsgərlərin döyüşdə göstərdiyi şücaətə şahid olduğunu qeyd edib. Onların böyük əzmlə döyüşdüklərini və yaralansalar belə mübarizədən vaz keçmədiklərini vurğulayıb.
Azərbaycan xüsusi təyinatlılarının təhsil və təlimlərinin Türkiyə təcrübəsinə əsaslandığını deyən Əhmədov, Türkiyədə aldığı təlimlərin müharibədə böyük fayda verdiyini bildirib. Türk mütəxəssislərdən öyrəndikləri təcrübənin öz vətənindəki döyüşlərdə vacib rol oynadığını da əlavə edib.
